Pune news : कोजागरी पौर्णिमेनिमित्त सार्वजनिक उद्याने रात्री १२ वाजेपर्यंत खुली राहणार

Pune news :पुणे: पुणेकरांना चांदण्यांच्या प्रकाशात आणि निसर्गाच्या सान्निध्यात कोजागरी पौर्णिमेचा आनंद घेता यावा यासाठी पुणे महानगरपालिकेने महत्त्वपूर्ण निर्णय घेतला आहे. रविवारी, २५ ऑक्टोबर २०२६ रोजी कोजागिरी पौर्णिमेचे औचित्य साधून शहरातील सर्व २१६ सार्वजनिक उद्याने रात्री १२ वाजेपर्यंत खुली ठेवण्याची घोषणा पालिका प्रशासनाने केली आहे.https://maharashtramirror.com/ Pune News

महाराष्ट्र महानगरपालिका अधिनियम, १९४९ मधील कलम ६६(१०) अन्वये सार्वजनिक आज, बागा आणि मनोरंजनासाठी मोकळ्या जागांची तरतूद करणे, तसेच नागरिकांना सुदृढ आणि निरोगी जीवनशैलीसाठी विरंगुळ्याच्या सुविधा उपलब्ध करून देणे ही महापालिकेची वैधानिक जबाबदारी आहे. पुणे महानगरपालिकेच्या उद्यान विभागाकडून शहराच्या विविध भागांत २१६ हून अधिक लहान-मोठी उद्याने विकसित व देखभाल केली जातात. रोजच्या धावपळीतून वेळ काढून नागरिक, बालके, ज्येष्ठ नागरिक तसेच देश-परदेशातील पर्यटक या उद्यानांना मोठ्या संख्येने भेट देतात. सामान्यत: शहरातील रात्री ८ किंवा ९ वाजेपर्यंत खुली असतात. मात्र, कोजागरी पौर्णिमेच्या दिवशी नागरिक कुटुंबीयांसह एकत्र येऊन चंद्रदर्शन घेतात. ही बाब विचारात घेऊन उद्यान विभागाने २५ ऑक्टोबर रोजी उद्यानांच्या वेळेत विशेष वाढ केली आहे. या दिवशी सार्वजनिक उद्याने सकाळी ६:०० ते ११:०० या नियमित वेळेत आणि सायंकाळी ४:०० ते थेट रात्री १२:०० वाजेपर्यंत खुली राहतील.

शरद ऋतूतील कोजागरी पौर्णिमेची रात्र ही विशेष मानली जाते. या रात्री लखलखणाऱ्या चांदण्यात आणि शीतल चंद्रप्रकाशात वेळ घालवणे हा पुणेकरांचा एक लाडका उपक्रम असतो. पालिकेच्या या निर्णयामुळे पुणेकरांना शहरातील हिरवळीवर, उद्यानातील शांत वातावरणात आपल्या कुटुंबीयांसोबत आणि मित्रांसोबत कोजागरी साजरी करता येणार आहे.

उद्यान विभागाचे सह महापालिका आयुक्त डॉ. अशोक दि. घोरपडे यांनी प्रसिद्धीपत्रकाद्वारे माहिती देताना सांगितले की, नागरिकांना स्वच्छ, सुरक्षित आणि प्रसन्न वातावरणात सणाचा आनंद घेता यावा यासाठी ही सोय करण्यात आली आहे. सर्व पुणेकर नागरिकांनी महापालिकेच्या या विशेष सुविधेचा जास्तीत जास्त लाभ घ्यावा, असे आवाहनही त्यांनी उद्यान विभागाच्या वतीने केले आहे.दरम्यान, उद्यानांमध्ये स्वच्छता राखणे, झाडे-झुडपे किंवा सार्वजनिक मालमत्तेचे नुकसान न करणे आणि शिस्त पाळणे याबाबतही प्रशासनाकडून नागरिकांना सहकार्याची विनंती करण्यात आली आहे.