‘राष्ट्रवादीचा एकही आमदार फुटणार नाही’; संजय राऊतांच्या दाव्याला हसन मुश्रीफ यांचं सडेतोड प्रत्युत्तर!

मुंबई : राज्याच्या राजकारणात दोन्ही राष्ट्रवादी काँग्रेसच्या संभाव्य विलीनीकरणाच्या चर्चांनी जोर धरला असतानाच आमदारांच्या संभाव्य फुटीवरून राजकीय वातावरण तापलं आहे. ठाकरे गटाचे खासदार संजय राऊत यांनी राष्ट्रवादी काँग्रेसचे २० ते २२ आमदार फुटणार असल्याचा दावा केला होता. त्यांच्या या विधानावर आता राष्ट्रवादी काँग्रेसचे नेते आणि मंत्री हसन मुश्रीफ यांनी जोरदार प्रत्युत्तर दिलं आहे.

संजय राऊत यांचा दावा फेटाळून लावताना हसन मुश्रीफ म्हणाले, “आमचा एकही आमदार पक्ष सोडून कुठेही जाणार नाही. २० ते २२ आमदार फुटणार असल्याचा दावा पूर्णपणे चुकीचा आहे.” यावेळी त्यांनी राऊत यांना राष्ट्रवादीच्या अंतर्गत बाबींमध्ये हस्तक्षेप न करण्याचा सल्लाही दिला. आमच्या पक्षाच्या अंतर्गत विषयांमध्ये संजय राऊत यांनी नाक खुपसू नये, अशा शब्दांत मुश्रीफ यांनी नाराजी व्यक्त केली.

सुनेत्रा पवार जो निर्णय घेतील, त्याला आमचा पाठिंबा!

दोन्ही राष्ट्रवादी काँग्रेसच्या विलीनीकरणाच्या चर्चांवरही मुश्रीफ यांनी आपली भूमिका स्पष्ट केली. सुनेत्रा पवार या पक्षाबाबत जो निर्णय घेतील, त्या निर्णयाच्या पाठीशी आम्ही ठामपणे उभे राहू, असं त्यांनी सांगितलं. त्यामुळे राष्ट्रवादीच्या भविष्यातील राजकीय वाटचालीबाबत सुनेत्रा पवार यांच्या भूमिकेला महत्त्व प्राप्त झालं आहे.

अजित पवारांच्या निधनानंतर पक्षाला कमकुवत करण्याचा प्रयत्न?

दरम्यान, अजित पवार यांच्या निधनानंतर राष्ट्रवादी काँग्रेस पक्षाला कमकुवत करण्याचे प्रयत्न सुरू असल्याचा गंभीर आरोपही हसन मुश्रीफ यांनी केला आहे. त्यामुळे राष्ट्रवादी काँग्रेसमधील अंतर्गत घडामोडी पुन्हा एकदा चर्चेच्या केंद्रस्थानी आल्या आहेत.

एकीकडे दोन्ही राष्ट्रवादी काँग्रेसच्या विलीनीकरणाची चर्चा सुरू आहे, तर दुसरीकडे २० ते २२ आमदार फुटणार असल्याचा संजय राऊत यांचा दावा आणि त्याला मुश्रीफ यांनी दिलेलं प्रत्युत्तर यामुळे राजकीय वातावरण चांगलंच तापलं आहे. आता सुनेत्रा पवार या विलीनीकरणाबाबत नेमकी काय भूमिका घेतात आणि राष्ट्रवादीच्या पुढील राजकीय वाटचालीची दिशा काय असणार, याकडे संपूर्ण राज्याचं लक्ष लागलं आहे.