Jejuri News : महापालिकेत नोकरीचे आमिष दाखवून कोट्यांवधीची फसवणूक करणाऱ्याला अटक

Jejuri News :पुणे : पुणे महानगरपालिकेत (पीएमसी) विविध पदांवर सरकारी नोकरी लावून देण्याचे आमिष दाखवून सुशिक्षित बेरोजगारांची तब्बल २ कोटी ७५ लाख रुपयांची फसवणूक केल्याप्रकरणी जेजुरी येथील प्रसिद्ध श्री मार्तंड देवस्थानचे विश्‍वस्त डॉ. राजेंद्र बाबुराव खेडेकर यांना शिवाजीनगर पोलिसांनी अटक केली आहे. या रॅकेटमध्ये पुणे महापालिकेतील कर्मचारी आणि अन्य सहकाऱ्यांचा समावेश असल्याचे निष्पन्न झाले असून, आरोपींनी उमेदवारांना बनावट नियुक्ती पत्रे देऊन हा संपूर्ण प्रकार घडवून आणल्याचे समोर आले आहे. https://maharashtramirror.com/ Jejuri News

न्यायालयाने आरोपी डॉ. राजेंद्र खेडेकर यांना ३ ऑक्टोबरपर्यंत पाच दिवसांची पोलीस कोठडी सुनावली आहे. या कारवाईमुळे पुणे शहर आणि परिसरात तसेच धार्मिक, राजकीय वर्तुळात प्रचंड खळबळ उडाली आहे. https://maharashtramirror.com/ Jejuri News

पोलीस तपासात मिळालेल्या माहितीनुसार, या रॅकेटने आतापर्यंत १४ हून अधिक सुशिक्षित बेरोजगारांना आपल्या जाळ्यात ओढले. महापालिकेत वर्ग-३ आणि वर्ग-४ च्या विविध विभागात कायमस्वरूपी नोकरी लावून देतो, असा बनाव रचून आरोपींनी प्रत्येक उमेदवाराकडून लाखो रुपये उकळले. अशा प्रकारे एकूण २ कोटी ७५ लाख रुपयांहून अधिक रकमेची फसवणूक झाल्याचे प्राथमिक तपासातून उघड झाले आहे.

या प्रकरणी पुणे महानगरपालिकेच्या सामान्य प्रशासन विभागातील एका अधीक्षकांनी दिलेल्या फिर्यादीवरून शिवाजीनगर आणि भारती विद्यापीठ पोलीस ठाण्यात रीतसर गुन्हा दाखल करण्यात आला आहे. डॉ. राजेंद्र बाबुराव खेडेकर यांच्यासह पुणे महापालिकेच्या शिक्षण विभागातील शिपाई शिवनंदन बाळासाहेब पाटील आणि इतर काही सहकाऱ्यांवर भारतीय न्याय संहितेच्या (BNS) विविध कलमांनुसार फसवणूक, बनावट कागदपत्रे तयार करणे आणि गुन्हेगारी कट रचल्याप्रकरणी गुन्हे नोंदवण्यात आले आहेत.

पोलिसांनी दिलेल्या माहितीनुसार, फसवणुकीचा हा संपूर्ण प्रकार मे २०२२ ते मे २०२५ या कालावधीत घडला. महापालिकेच्या आवारात तसेच शहरातील इतर ठिकाणी बैठका घेऊन उमेदवारांना विश्वासात घेण्यात आले होते.

आरोपींनी महापालिकेच्या अधिकृत लेटरहेडचा गैरवापर केला. तसेच महापालिकेचे वरिष्ठ अधिकारी, विभाग प्रमुख यांच्या बनावट सह्या आणि शिक्के तयार करून हुबेहूब दिसणारी नियुक्ती पत्रे तयार केली. आरोपींचा बनाव इतक्यावरच थांबला नाही; त्यांनी तरुणांना महापालिकेचे बनावट ओळखपत्र , सर्व्हिस बुक , वैद्यकीय प्रमाणपत्रे आणि दरमहा मिळणाऱ्या पगाराच्या बनावट स्लिप्स देखील दिल्या.

विशेष म्हणजे, ही नोकरी पूर्णपणे खरी आहे असा भास निर्माण करण्यासाठी आरोपींनी काही महिने उमेदवारांच्या बँक खात्यात थेट पगार जमा झाल्याच्या बनावट नोंदी आणि व्यवहार दाखवले. त्यामुळे उमेदवारांचा संशय पूर्णपणे मावळला होता. मात्र, प्रत्यक्ष कामावर रुजू होण्याच्या प्रक्रियेत आणि महापालिकेच्या तपासणीत ही सर्व कागदपत्रे बोगस असल्याचे समोर आल्यावर तरुणांना आपली फसवणूक झाल्याचे लक्षात आले.

गुन्हा दाखल झाल्यानंतर मुख्य आरोपी डॉ. राजेंद्र खेडेकर फरार झाला होता. अटक टाळण्यासाठी त्याने पुणे सत्र न्यायालयात अटकपूर्व जामीन अर्ज दाखल केला होता. मात्र, सरकारी वकील आणि पोलिसांनी न्यायालयात जोरदार युक्तिवाद करताना सांगितले की, हा प्रकार अत्यंत गंभीर असून हे एक संघटित रॅकेट आहे. फसवणुकीची रक्कम मोठी असून या प्रकरणात महापालिकेतील आणखी काही अधिकारी व कर्मचाऱ्यांचा सहभाग असण्याची शक्यता नाकारता येत नाही. त्यामुळे या संपूर्ण कटाचा पर्दाफाश करण्यासाठी आणि गुन्ह्यातील पैशांचा सुगावा लावण्यासाठी आरोपीची कस्टडीत चौकशी होणे अत्यंत गरजेचे आहे.

न्यायालयाने पोलिसांचा हा युक्तिवाद ग्राह्य धरत डॉ. खेडेकर यांचा अटकपूर्व जामीन अर्ज फेटाळून लावला. जामीन अर्ज फेटाळताच शिवाजीनगर पोलिसांनी वेगाने हालचाली करत खेडेकर यांना अटक केली. त्यानंतर त्यांना न्यायालयात हजर केले असता, न्यायालयाने आरोपीला ३ ऑक्टोबरपर्यंत पोलीस कोठडीत ठेवण्याचे आदेश दिले आहेत.

सध्या या प्रकरणाचा पुढील तपास वरिष्ठ पोलीस निरीक्षक गिरीश दिघावकर यांच्या मार्गदर्शनाखाली शिवाजीनगर पोलीस ठाण्याचे पथक करत आहे. या प्रकरणात अडकलेल्या महापालिकेच्या इतर कर्मचाऱ्यांचा शोध सुरू असून, फसवणूक झालेल्या उमेदवारांची संख्या आणखी वाढण्याची शक्यता पोलिसांनी व्यक्त केली आहे.

दरम्यान, जेजुरीसारख्या महत्त्वाच्या देवस्थानच्या विश्‍वस्ताचा अशा गंभीर आणि मोठ्या आर्थिक गुन्ह्यात सहभाग आढळल्याने भाविकांमधून आणि नागरिकांमधून तीव्र संताप व्यक्त केला जात आहे. सुशिक्षित तरुणांनी कोणत्याही शासकीय नोकरीसाठी अशा प्रकारच्या आमिषांना बळी पडू नये आणि अनधिकृत मध्यस्थांना पैसे देऊ नयेत, असे आवाहन पोलीस प्रशासनाकडून करण्यात आले आहे.