Pune News : वारकऱ्यांचे पुणे महापालिकेकडून उत्साहात स्वागत

दिंडी प्रमुख आणि वीणेकऱ्यांचा विशेष सन्मान

पुणे, महाराष्ट्र मिरर : आषाढी वारीच्या निमित्ताने पुणे शहरात आगमन झालेल्या विविध दिंड्यांचे आणि वारकऱ्यांचे पुणे महापालिकेच्या वतीने अत्यंत उत्साहात आणि भक्तिमय वातावरणात स्वागत करण्यात आले. वारी मार्गावर वारकऱ्यांचे स्वागत करण्यासाठी महापालिकेचे पदाधिकारी, अधिकारी आणि कर्मचारी उपस्थित होते. यावेळी महापौर मंजुषा नागपुरे यांच्या हस्ते पुण्यात दाखल झालेल्या दिंड्यांचे स्वागत करण्यात आले.Pune News

वारी हा केवळ एक धार्मिक सोहळा नसून तो सेवा, समर्पण आणि मानवतेचा एक मोठा उत्सव आहे, याच सेवाभावाने महापालिका प्रत्येक वारकऱ्याच्या सोयी आणि सेवेसाठी सदैव तत्पर असल्याचे याप्रसंगी सांगण्यात आले.

या स्वागत सोहळ्यादरम्यान वारकऱ्यांप्रति कृतज्ञता व्यक्त करत विविध दिंडी प्रमुख आणि वीणेकऱ्यांचा श्रीफळ आणि गुलाबपुष्प देऊन विशेष सन्मान करण्यात आला.Pune News

ज्ञानोबा-तुकारामांच्या जयघोषात आणि टाळ-मृदंगाच्या गजरात हा स्वागत सोहळा पार पडला. वारीच्या प्रवासात वारकऱ्यांना कोणत्याही आरोग्याशी संबंधित अडचणी येऊ नयेत आणि त्यांची सुरक्षितता राखली जावी, या हेतूने पुणे महापालिकेच्या वतीने सर्व प्रमुख दिंडी प्रमुखांना विशेष प्रथमोपचार किटचे वितरण करण्यात आले, जेणेकरून प्रवासात कोणाचीही प्रकृती बिघडल्यास त्यांच्यावर तातडीने प्राथमिक उपचार करणे सोपे होईल.Pune News

या विशेष प्रसंगी महापालिकेचे सदस्य, वरिष्ठ अधिकारी आणि कर्मचारी मोठ्या संख्येने उपस्थित होते. पुणे शहरात मुक्कामी असणाऱ्या लाखो वारकऱ्यांच्या सोयी-सुविधा, स्वच्छता, शुद्ध पिण्याचे पाणी, चोवीस तास वैद्यकीय सेवा आणि सुरक्षितता या सर्व गोष्टींसाठी महापालिका प्रशासन पूर्ण ताकदीने कार्यरत आहे. प्रत्येक वारकऱ्याचा पुण्यातील मुक्काम सुखाचा आणि सुरक्षित व्हावा, यासाठी आवश्यक त्या सर्व नागरी सुविधांची काळजी महापालिकेकडून घेतली जात असल्याचे प्रशासकीय अधिकाऱ्यांनी स्पष्ट केले.

Pune News