मुंबईत दिवाळीत फटाक्यांमुळे ३३३ ठिकाणी आग

मुंबई, महाराष्ट्र मिरर : यंदा दिवाळीच्या पहिल्या पाच दिवसांत मुंबई शहरात आगीच्या तब्बल ४९९ घटनांची नोंद झाली असून, त्यापैकी ३३३ घटना फटाक्यांमुळे घडल्या आहेत. गेल्या दोन वर्षांच्या तुलनेत ही संख्या सर्वाधिक आहे. या दुर्घटनांमध्ये १० जण जखमी झाले, तर मालाड-मालवणी येथील फटाक्यांच्या दुकानाला लागलेल्या आगीत १६ वर्षांच्याS मुलाचा मृत्यू झाला.

गेल्या दोन वर्षांतील आकडेवारी पाहता यंदा फटाक्यांमुळे लागलेल्या आगींच्या घटनांमध्ये लक्षणीय वाढ झाल्याचे दिसते. २०२४ मध्ये दिवाळीदरम्यान मुंबईत आगीच्या २६२ घटना घडल्या होत्या. त्यापैकी ८० घटना फटाक्यांमुळे झाल्या होत्या. २०२५ मध्ये आगीच्या घटनांची संख्या २८९ होती, तर त्यातील ११३ घटना फटाक्यांशी संबंधित होत्या. यंदा मात्र फटाक्यांमुळे लागलेल्या आगींची संख्या थेट ३३३ वर पोहोचली आहे.

लक्ष्मीपूजनाच्या दिवशी सर्वाधिक घटना

लक्ष्मीपूजनाच्या दिवशी, म्हणजेच ८ नोव्हेंबरला मुंबईत आगीच्या सर्वाधिक १४२ घटनांची नोंद झाली. त्यापैकी १३७ घटना फटाक्यांमुळे घडल्या. ९ नोव्हेंबरला आगीच्या १६६ घटना नोंदवण्यात आल्या. त्यातील १४४ घटना फटाक्यांशी संबंधित होत्या. दिवाळी पाडव्याच्या दिवशी, १० नोव्हेंबरला आगीच्या १०२ घटना घडल्या असून, त्यापैकी २४ घटना फटाक्यांमुळे झाल्या.

बंदी असूनही रॉकेटचा वापर

मुंबईत रॉकेट आणि आकाशात उडणाऱ्या फटाक्यांवर बंदी असतानाही नियमांचे उल्लंघन झाल्याचे समोर आले आहे. उंच इमारतींची छते, बाल्कनी आणि खिडक्यांमध्ये रॉकेट पडल्यास मोठी दुर्घटना घडण्याचा धोका असतो. या बंदीची अंमलबजावणी करण्याची जबाबदारी पोलीस उपायुक्त, महापालिकेचे सहाय्यक आयुक्त आणि अग्निशमन अधिकाऱ्यांवर आहे. मात्र, कारवाई नेमकी कोणी आणि कशी करायची, याबाबत स्पष्ट सूचना नसल्याने अंमलबजावणीत अडचणी निर्माण झाल्याचे चित्र आहे. बंदीनंतर किती ठिकाणी कारवाई झाली, याची आकडेवारीही महापालिका प्रशासनाकडे उपलब्ध नसल्याचे सांगण्यात आले आहे.

जनजागृतीनंतरही फटाक्यांचा वापर कायम

न्यायालयाच्या निर्देशानुसार महापालिकेने बॉलिवूड कलाकारांच्या माध्यमातून नागरिकांना फटाके न फोडण्याचे आवाहन केले होते. मात्र, जनजागृती आणि बंदी असूनही फटाक्यांचा वापर कमी झालेला दिसत नाही. परिणामी, दिवाळीदरम्यान आगीच्या घटनांमध्ये मोठी वाढ झाली असून, नागरिकांच्या सुरक्षिततेचा प्रश्न पुन्हा ऐरणीवर आला आहे.