Pune News : उत्सवाचा जल्लोष संपला, प्रशासनाची उदासीनता सुरू!

Pune News : पुणे : गणेशोत्सवाचा जल्लोष उत्साहात पार पडल्यानंतर आता शहरातील प्रमुख रस्ते, चौक आणि सार्वजनिक जागांवर विसर्जनानंतरचे भयाण वास्तव समोर आले आहे. उत्सवाच्या काळात उभारण्यात आलेले मंडप, अनधिकृत फ्लेक्स, पोस्टर्स आणि इतर साहित्य अजूनही रस्त्यांवर कायम असतानाच, आता मिरवणुकीसाठी वापरण्यात आलेल्या ट्रॅक्टर-ट्रॉल्या बेवारसपणे रस्त्याच्या मध्यभागी आणि कडेला सोडून दिल्याचा गंभीर प्रकार उघडकीस आला आहे. या ट्रॅक्टर-ट्रॉलीच्या बाहेर आलेल्या टोकदार लोखंडी सळया आणि बारमुळे वाहनधारकांसह पादचाऱ्यांच्या जिवाला गंभीर धोका निर्माण झाला असून, शहरातील वाहतूक पूर्णपणे कोलमडली आहे.https://maharashtramirror.com/ Pune News

शहरातील अनेक भागांत विसर्जन मिरवणूक संपून २४ तासांहून अधिक काळ लोटला तरीही गणेश मंडळांनी मिरवणुकीसाठी आणलेल्या ट्रॅक्टर-ट्रॉल्या तशाच उघड्यावर सोडून दिल्या आहेत. या ट्रॉलींमधील लोखंडी सांगाडे व सळया बाहेर आल्याने रस्त्याचा अर्ध्याहून अधिक भाग व्यापला गेला आहे. यामुळे दोन्ही बाजूंनी ये-जा करणाऱ्या वाहनांना प्रचंड कसरत करावी लागत असून, वाहनांच्या लांबच लांब रांगा लागत आहेत. रात्रीच्या वेळी पुरेसा प्रकाश नसल्यास किंवा गर्दीच्या वेळी एखादा मोठा जीवघेणा अपघात घडण्याची तीव्र भीती स्थानिक नागरिकांकडून व्यक्त केली जात आहे. दरम्यान, याप्रकरणी नागरिक मंचाने पुणे महानगरपालिकेला ४८ तासांत शहर रस्तेमुक्त करा असा अल्टिमेटम दिला आहे. https://maharashtramirror.com/ Pune News

गणेशोत्सव संपून दिवस उलटले तरी अनेक भागांत मंडप, अनधिकृत फ्लेक्स आणि डिजिटल बोर्ड जसेच्या तसे आहेत. विशेषतः सिग्नलच्या जवळ, दुभाजकांवर आणि अत्यंत धोकादायक पद्धतीने लावण्यात आलेले हे फलक वाहनधारकांचे लक्ष विचलित करत आहेत. यामुळे शहरात अनेक ठिकाणी वाहतूक कोंडी होत असून अपघाताची भीती व्यक्त केली जात आहे.

"रस्त्यांवर आणि सिग्नलजवळ अत्यंत धोकादायक पद्धतीने उभारलेले हे जाहिरात साहित्य वाहनधारकांसाठी मोठी डोकेदुखी ठरत आहे. उत्सवाच्या नावाखाली झालेली ही विद्रुपीकरण मोहीम आता थांबली पाहिजे," असे 'क्रिएटिव्ह फाउंडेशन' या नागरी संघटनेचे अध्यक्ष संदीप खर्डेकर यांनी सांगितले.

प्रशासनाने तातडीने कारवाई करून पुढील ४८ तासांत शहरातील सर्व प्रमुख आणि अंतर्गत रस्ते पूर्ववत मोकळे करावेत, असा इशारा या पत्राद्वारे देण्यात आला आहे.

दीर्घकाळ चालणाऱ्या विसर्जन मिरवणुकींमुळे आणि उत्सवाच्या नावाखाली होणाऱ्या त्रासामुळे सर्वसामान्य नागरिक अत्यंत त्रस्त झाले आहेत. कचरा व्यवस्थापनाचा फज्जा, प्रचंड ध्वनीप्रदूषण आणि यामुळे दैनंदिन जीवनात होणारा व्यत्यय यावर स्थानिक लोकप्रतिनिधींनी ठोस भूमिका घ्यावी, अशी तीव्र भावना नागरिक व्यक्त करत आहेत.

या संदर्भात बोलताना ज्येष्ठ नागरिक श्यामला देसाई म्हणाल्या, "गणपती मंडळांच्या अशा अनधिकृत आणि शिस्तभंग करणाऱ्या कृत्यांची थेट जबाबदारी स्थानिक खासदार आणि आमदारांवरच असली पाहिजे. जर तुम्ही लोकप्रतिनिधी असताना लोक तुमचे ऐकत नसतील, तर तुमचा त्यांच्यावर कोणताही वचक नाही असाच याचा अर्थ होतो। या सर्व नागरी समस्यांसाठी आणि विद्रुपीकरणासाठी लोकप्रतिनिधींनाच उत्तरदायी धरले पाहिजे."

दरम्यान, वाढत्या नागरिक असंतोषाच्या पार्श्वभूमीवर पुणे महानगरपालिकेच्या अधिकाऱ्यांनी आपली बाजू स्पष्ट केली आहे.सार्वजनिक मालमत्तेचे विद्रुपीकरण रोखण्यासाठी कायद्यात कडक तरतुदी असल्याचे प्रशासनाने म्हटले आहे.

'महाराष्ट्र सार्वजनिक मालमत्तेच्या विद्रुपीकरणास प्रतिबंध अधिनियम, १९९५' या कायद्यानुसार सार्वजनिक मालमत्तेचे नुकसान किंवा विद्रुपीकरण करणाऱ्या व्यक्ती अथवा संस्थांवर थेट दंडात्मक आणि कायदेशीर कारवाई करण्याचा अधिकार महापालिकेला आहे.

"या वैधानिक तरतुदींचा वापर करून शहरभर अनधिकृत जाहिरात साहित्य आणि फ्लेक्स लावणाऱ्या घटकांवर व जबाबदार व्यक्तींवर गुन्हे दाखल करण्याची आणि कायदेशीर कारवाई करण्याची प्रक्रिया सुरू करण्यात आली आहे," अशी माहिती महापालिकेच्या एका वरिष्ठ अधिकाऱ्याने दिली.

गणेशोत्सवाच्या काळात कोट्यवधी रुपयांची उलाढाल आणि प्रचंड उत्साह पाहायला मिळत असला, तरी उत्सवानंतरच्या या अस्ताव्यस्त परिस्थितीमुळे पुणेकरांचे आरोग्य आणि सुरक्षितता धोक्यात आली आहे. महापालिका प्रशासन नागरिक गटाने दिलेल्या ४८ तासांच्या अल्टीमेटमची दखल घेऊन शहर कधी स्वच्छ आणि मोकळे करते, याकडे आता संपूर्ण पुणेकरांचे लक्ष लागले आहे.