Pune News : शहरातील वाहतूक कोंडी सुरळीत होणार

Pune News : पुणे, महाराष्ट्र मिरर : शहरातील वाढती वाहतूक कोंडी आणि अपघातांच्या वाढत्या घटनांवर नियंत्रण मिळवण्यासाठी पुणे महानगरपालिका क्षेत्रातील महत्त्वाच्या २५० चौकांमध्ये ५०० ट्रॅफिक वॉर्डन नियुक्त करण्याचा महत्त्वपूर्ण निर्णय घेण्यात आला आहे. स्थायी समितीने या प्रस्तावास मंजुरी दिली असून, यासाठी वर्षभरात १७ कोटी ९ लाख रुपयांचा खर्च अपेक्षित आहे.https://maharashtramirror.com/ Pune News

शहरातील वाढती लोकसंख्या, वाहनांची संख्या आणि प्रमुख रस्त्यांवर होणारी वाहतूक कोंडी लक्षात घेता, वाहतूक पोलिसांनी महापालिकेकडे अतिरिक्त मनुष्यबळाची मागणी केली होती. महापौर मंजुषा नागपुरे यांनीही कोंडी दूर करण्यासाठी तातडीने वॉर्डन नेमण्याच्या सूचना दिल्या होत्या. या पार्श्वभूमीवर १४ ऑगस्ट रोजी महापालिका आणि वाहतूक पोलिस विभागात उच्चस्तरीय बैठक पार पडली. यामध्ये वाहतूक विभागाने सुचवलेल्या २४२ चौकांमध्ये प्रत्येकी दोन आणि बावधन विभागातील ८ चौकांसाठी १६ ट्रॅफिक वॉर्डन नेमण्याचे निश्चित करण्यात आले.https://maharashtramirror.com/ pune news

यंदाच्या महापालिकेच्या अंदाजपत्रकात वाहतूक नियोजनासाठी योग्य तरतूद करण्यात आली आहे. या कामाचे पूर्वगणपत्रक १७ कोटी ८ लाख ९९ हजार ५६० रुपये इतके तयार करण्यात आले आहे. नियमानुसार निविदा प्रक्रिया आणि कार्यादेश देण्यासाठी होणारा विलंब टाळण्यासाठी महापालिका आयुक्त नवल किशोर राम यांनी महाराष्ट्र महानगरपालिका अधिनियमातील कलम ६७-३ (क) नुसार मिळालेल्या आणीबाणीच्या विशेष अधिकारांचा वापर करत हे काम तातडीने हाती घेण्याचे आदेश दिले आहेत. जनतेची सुरक्षितता आणि आपत्कालीन परिस्थिती लक्षात घेऊन हा निर्णय घेण्यात आला आहे.

यापूर्वी ट्रॅफिक वॉर्डनच्या सेवा शुल्कासह मनुष्यबळ पुरविण्याची कार्यवाही सुरक्षा विभागामार्फतच पार पाडण्यात आली होती. त्यामुळे सदरचे काम सुरक्षा विभागामार्फतच करून घेण्याची शिफारस करण्यात आली आहे. वाहतूक पोलिसांच्या समन्वयाने हे ५०० वॉर्डन शहरातील प्रमुख चौकांमध्ये वाहतूक नियमन, कोंडी निवारण आणि नागरिकांच्या सुरक्षिततेसाठी कार्यरत राहणार आहेत. या निर्णयामुळे पुणेकरांचा प्रवास अधिक सुकर आणि सुरक्षित होण्यास मदत मिळणार आहे.