Thane News : प्रदीप पूर्णेकर हत्या प्रकरण: राम पूर्णेकरांची ठाण्यात मुख्यमंत्री देवेंद्र फडणवीसांशी भेट; "मी तुझ्या पाठीशी आहे, न्याय मिळवून देणार!" मुख्यमंत्र्यांचा धीर

Thane News :ठाणे :- ठाकरे गटाचे दिवंगत विभागप्रमुख प्रदीप पूर्णेकर यांच्या चर्चित हत्या प्रकरणाला आता एक अत्यंत महत्त्वपूर्ण वळण मिळाले आहे. न्याय मिळवण्यासाठी आक्रमक झालेले प्रदीप पूर्णेकर यांचे पुत्र राम पूर्णेकर यांनी ठाणे दौऱ्यावर आलेल्या मुख्यमंत्री देवेंद्र फडणवीस यांची भेट घेतली. मुख्यमंत्र्यांनी यावेळी राम पूर्णेकर यांना धीर देत, "तुझ्या वडिलांवर कोणताही अन्याय होऊ देणार नाही, मी आणि माझे सरकार तुझ्या पाठीशी खंबीरपणे उभे आहे," असा ठाम शब्द दिला. या उच्चस्तरीय भेटीमुळे ठाणे आणि राज्यातील राजकीय वर्तुळात पुन्हा एकदा चर्चांना उधाण आले आहे.https://maharashtramirror.com/ Thane News

नवरात्रोत्सवाच्या निमित्ताने मुख्यमंत्री देवेंद्र फडणवीस हे ठाण्यातील बाळकूम व हायलँड पार्क परिसरातील विविध सार्वजनिक मंडळांना भेट देण्यासाठी आले होते. याच दरम्यान भाजपचे आमदार संजय केळकर आणि उपमहापौर कृष्णा पाटील यांच्या माध्यमातून राम पूर्णेकर यांनी मुख्यमंत्र्यांची भेट घेत एक निवेदन सादर केले. आपल्या वडिलांच्या हत्येप्रकरणी योग्य तो तपास होऊन कुटुंबाला लवकरात लवकर न्याय मिळावा, अशी आर्त हाक त्यांनी यावेळी मुख्यमंत्र्यांसमोर घातली. राम पूर्णेकरांचे म्हणणे ऐकून घेत मुख्यमंत्र्यांनी त्यांना तातडीने सकारात्मक प्रतिसाद दिला आणि दोन दिवसांनी पुन्हा सविस्तर चर्चेसाठी बोलावले आहे.

प्रदीप पूर्णेकर यांच्या हत्येप्रकरणी याआधीच 5 मुख्य आरोपींना अटक करण्यात आली असून, या प्रकरणाच्या तपासाला आता वेग आला आहे. या प्रकरणातील पुरवणी एफआयआरमध्ये माजी महापौर मीनाक्षी शिंदे आणि त्यांचे पती राजेंद्र शिंदे यांची नावे समाविष्ट असून, ठाणे गुन्हे शाखेने राजेंद्र शिंदे यांची तब्बल दोन दिवस सखोल व दीर्घ चौकशी केली आहे. स्थानिक पातळीवर या प्रकरणाचे तीव्र पडसाद उमटत असतानाच, पूर्णेकर कुटुंबाने थेट मुख्यमंत्र्यांकडे धाव घेतल्यामुळे या प्रकरणाचा तपास आता अधिक निर्णायक टप्प्यात पोहोचल्याचे मानले जात आहे.