Pune News : ऑनलाइन गेमिंग, ओटीटी पाहताना सावधान! तरुणांमध्ये रक्ताच्या गुठळ्यांचा धोका

Pune News :पुणे - ऑनलाइन गेमिंग खेळणे, ऑनलाइन शैक्षणिक वर्गांना हजेरी लावणे किंवा ओटीटीवरील कार्यक्रम पाहणे यासाठी तासनतास बसून राहणाऱ्या युवकांसाठी आता धोक्याचा इशारा देण्यात आला आहे. अशा युवकांच्या पायांमध्ये रक्ताच्या गुठळ्या होण्याची शक्यता असल्याचे रक्तवाहिनीतज्ज्ञांनी स्पष्ट केले आहे. युवकांमधील बैठी जीवनशैली आणि व्हेनस थ्रोम्बोएम्बोलिझम (VTE) यांच्यातील संबंध दर्शविणारे संशोधनही यासाठी पुढे करण्यात आले आहे.https://maharashtramirror.com/ Pune News
तासनतास एकाच जागी बसून राहिल्याने पायांतील रक्तप्रवाहाचा वेग मंदावतो. पायांच्या स्नायूंच्या हालचाली कमी झाल्यामुळे रक्त हृदयाकडे परत नेण्याची प्रक्रिया मंदावते. परिणामी, काही व्यक्तींमध्ये रक्ताच्या गुठळ्या तयार होण्याचा धोका वाढू शकतो. पायातील खोल रक्तवाहिन्यांमध्ये गुठळी तयार होण्याच्या स्थितीला डीप व्हेन थ्रोम्बोसिस (DVT) म्हणतात. ही गुठळी रक्तप्रवाहातून फुफ्फुसांपर्यंत पोहोचल्यास पल्मनरी एम्बोलिझमसारखी जीवघेणी गुंतागुंत निर्माण होऊ शकते.
२०२४ मध्ये प्रसिद्ध झालेल्या संशोधनाच्या आढाव्यानुसार, सर्वाधिक बैठी जीवनशैली असलेल्या व्यक्तींमध्ये सर्वांत कमी बैठी जीवनशैली असलेल्या व्यक्तींच्या तुलनेत व्हेनस थ्रोम्बोएम्बोलिझमचा धोका सुमारे २४ टक्के अधिक आढळला. मात्र, याचा अर्थ दीर्घकाळ स्क्रीनसमोर बसणाऱ्या प्रत्येक युवकाला रक्ताची गुठळी होईल असा नाही. दीर्घकाळ हालचाल न करणे, लठ्ठपणा, शरीरातील पाण्याची कमतरता, धूम्रपान आणि रक्त गोठण्यासंबंधीचे काही विकार यांमुळे धोका वाढू शकतो.
तज्ज्ञांच्या मते, ऑनलाइन गेमिंग किंवा ओटीटी कार्यक्रम पाहणे पूर्णपणे बंद करण्याची आवश्यकता नाही. मात्र, सलग अनेक तास बसून राहणे टाळणे महत्त्वाचे आहे. दर अर्ध्या तासाने उठून थोडे चालणे, पायांची हालचाल करणे, पुरेसे पाणी पिणे आणि नियमित व्यायाम करणे यांसारख्या सवयी अंगीकाराव्यात.
पायाच्या एका बाजूला अचानक सूज येणे, वेदना होणे, पाय गरम होणे किंवा लालसरपणा दिसणे ही रक्ताच्या गुठळीची संभाव्य लक्षणे असू शकतात. अचानक श्वास घेण्यास त्रास होणे किंवा छातीत दुखणे अशी लक्षणे आढळल्यास तातडीने वैद्यकीय मदत घ्यावी.