Pune News : भरधाव कारने विद्यार्थिनींना चिरडले; एकीचा मृत्यू

Pune News :पुणे, महाराष्ट्र मिरर : महाविद्यालयात जाण्यासाठी एसटी बसची वाट पाहत बसथांब्यावर उभ्या असलेल्या विद्यार्थिनींच्या घोळक्याला भरधाव कारने धडक दिल्याची भीषण घटना खेड तालुक्यातील कुरकुंडी फाटा येथे घडली. या अपघातात अदिती नवनाथ राळे या विद्यार्थिनीचा मृत्यू झाला, तर अन्य पाच विद्यार्थिनी जखमी झाल्या. अपघातानंतर कारचालक घटनास्थळावरून फरार झाल्याची माहिती आहे.
शुक्रवारी (२३ ऑक्टोबर) सकाळी आठच्या सुमारास हा अपघात झाला. कुरकुंडी गावातील सात ते आठ महाविद्यालयीन विद्यार्थिनी कुरकुंडी फाटा येथील बसथांब्यावर एसटी बसची वाट पाहत उभ्या होत्या. त्याचवेळी राजगुरुनगरच्या दिशेने येणाऱ्या भरधाव चारचाकी वाहनाने विद्यार्थिनींच्या घोळक्याला जोरदार धडक दिली. धडकेमुळे परिसरात गोंधळ उडाला.अपघातात गंभीर जखमी झालेल्या विद्यार्थिनींना तातडीने राजगुरुनगर येथील खासगी रुग्णालयात दाखल करण्यात आले. मात्र, उपचार सुरू असताना अदिती राळे हिचा मृत्यू झाला. अन्य पाच विद्यार्थिनी जखमी झाल्या आहेत.https://maharashtramirror.com/ Pune News

शिक्षक मतदारसंघाच्या उमेदवाराचा प्रतिनिधी वाहनात?
अपघातग्रस्त वाहनातून शिक्षक मतदारसंघाच्या एका उमेदवाराचा बूथ प्रतिनिधी पाईट मतदान केंद्राकडे जात असल्याची माहिती समोर आली आहे. वाहन घाईत असताना हा अपघात घडल्याचे सांगण्यात येत असले, तरी अपघाताचे नेमके कारण पोलिस तपासानंतर स्पष्ट होणार आहे.

चालकाला अटक करण्याची नातेवाइकांची मागणी
अपघाताची माहिती मिळताच उत्तर महाळुंगे एमआयडीसी पोलिस ठाण्याचे पथक घटनास्थळी दाखल झाले. अदितीच्या मृत्यूनंतर तिच्या नातेवाइकांनी संताप व्यक्त केला असून, फरार चालकाला शोधून ताब्यात घेतल्याशिवाय मृतदेह स्वीकारणार नसल्याची भूमिका घेतली आहे.

या घटनेमुळे बसथांब्यांजवळील वाहतुकीचा वेग आणि विद्यार्थिनींच्या सुरक्षिततेचा प्रश्न पुन्हा ऐरणीवर आला आहे.