CRIME NEWS : शिरूर तालुक्यात घरकामाच्या वादातून नातवाने केला ८४ वर्षीय आजोबांचा खून

लोखंडी गजाने डोक्यात केले वार; शिरूर पोलिसांत आरोपी पुतण्याविरुद्ध गुन्हा दाखल

पुणे, महाराष्ट्र मिरर, CRIME NEWS : पुणे जिल्ह्याच्या शिरूर तालुक्यातील बाभुळसर बुद्रुक येथे घरकाम आणि शेतातील कामे सांगत असल्याचा तीव्र राग मनात धरून एका २६ वर्षीय माथेफिरू तरुणाने आपल्या ८४ वर्षीय सख्ख्या आजोबांची डोक्यात आणि पाठीवर लोखंडी गजाने (सळईने) बेदम प्रहार करून अत्यंत निर्घृण हत्या केल्याची धक्कादायक घटना घडली आहे.CRIME NEWS

या प्रकरणी दुर्योधन दशरथ राऊत (वय ५६, (रा. बाभुळसर बुद्रुक, ता. शिरूर, जि. पुणे) यांनी शिरूर पोलीस ठाण्यात रीतसर फिर्याद दिली आहे. त्यांच्या तक्रारीवरून पोलिसांनी संशयित आरोपी सोमनाथ बाळासो राऊत (वय २६, रा. बाभुळसर बुद्रुक, ता. शिरूर, जि. पुणे) याच्याविरुद्ध भारतीय न्याय संहिता कलम १०३(१) अन्वये खुनाचा गुन्हा दाखल केला आहे.CRIME NEWS

या भीषण हल्ल्यामध्ये वृद्ध दशरथ यशवंत राऊत (वय ८४, रा. बाभुळसर बुद्रुक) यांचा मृत्यू झाला आहे. ही घटना सोमवारी (१५ जून) सकाळी घडली आहे.

पोलिसांनी दिलेल्या सविस्तर माहितीनुसार, मयत दशरथ राऊत हे ८४ वर्षांचे ज्येष्ठ नागरिक होते. त्यांचे नातू (फिर्यादीचे पुतणे) आणि आरोपी सोमनाथ राऊत यांच्यामध्ये घरकाम व शेतीच्या कामांवरून गेल्या काही दिवसांपासून घरात किरकोळ वाद सुरू होते. सोमवारी सकाळी आठ वाजण्याच्या सुमारास दशरथ हे घरासमोरील अंगणात उभे होते. त्यावेळी त्यांनी नातू सोमनाथ याला घरातील आणि शेतातील काही कामे करण्यास सांगितले. वृद्ध आजोबांनी कामे सांगितल्याचा सोमनाथ याला प्रचंड राग आला. रागाच्या भरात त्याचे मानसिक संतुलन बिघडले आणि त्याने घरातील एक जाड लोखंडी गज आणला. काही समजण्याच्या आतच सोमनाथ याने दशरथ यांच्या डोक्यावर आणि पाठीवर लोखंडी गजाने अत्यंत ताकदीने सपासप प्रहार केले. या हल्ल्यात वृद्ध आजोबा गंभीर जखमी होऊन रक्ताच्या थारोळ्यात अंगणात कोसळले. डोक्यात वर्मी घाव बसल्यामुळे आणि अतिरक्तस्रावामुळे त्यांचा जागीच दुर्दैवी मृत्यू झाला.CRIME NEWS

या घटनेची माहिती मिळताच शिरूर पोलीस ठाण्याचे पोलीस पथक घटनास्थळी दाखल झाले. पोलिसांनी मृतदेह ताब्यात घेऊन शवविच्छेदनासाठी पाठवला आणि घटनास्थळावरून रक्ताने माखलेला लोखंडी गज जप्त केला. एका साध्या कौटुंबिक वादातून नातवानेच आपल्या वृद्ध आजोबांचा खून केल्यामुळे संपूर्ण बाभुळसर बुद्रुक गाव हादरून गेले आहे. या घटनेने बाभुळसर बुद्रुक परिसरात तणाव निर्माण झाला असून, परिसरात तीव्र संताप व हळहळ व्यक्त होत आहे.CRIME NEWS

शिरूर पोलीस ठाण्याचे पोलीस उपनिरीक्षक पवार या गुन्ह्याचा पुढील सखोल तपास करत आहेत.

CRIME NEWS