CRIME NEWS : ’युनो ॲप’ डाऊनलोडच्या बहाण्याने ७८ वर्षीय वृद्धाची ९.९३ लाखांची फसवणूक

सिंहगड रस्ता पोलिसांत गुन्हा दाखल; मोबाईलचा ॲक्सेस घेऊन घातला गंडा

पुणे CRIME NEWS: पुणे शहरातील सिंहगड रस्ता परिसरात राहणाऱ्या एका ७८ वर्षीय ज्येष्ठ नागरिकाला मोबाईलवर संपर्क साधून बँकेचे अधिकृत ‘युनो ॲप’ डाऊनलोड करून देण्याच्या बहाण्याने त्यांच्या मोबाईलचा संपूर्ण ताबा (ॲक्सेस) मिळवून तब्बल ९ लाख ९३ हजार ७७२ रुपयांची ऑनलाईन फसवणूक केल्याची धक्कादायक घटना समोर आली आहे.

याप्रकरणी सिंहगड रस्ता परिसरात राहणाऱ्या एका ७८ वर्षीय पीडित ज्येष्ठ नागरिकाने सिंहगड रस्ता पोलीस ठाण्यात फिर्याद दिली आहे. त्यांच्या तक्रारीवरून पोलिसांनी संशयित अज्ञात मोबाईलधारक, इंटरनेट लिंकधारक, बँक खातेधारक आणि या फसवणुकीत वापरण्यात आलेल्या बँक खात्यांच्या वापरकर्त्यांविरुद्ध भारतीय न्याय संहिता कलम ३१९(२), ३१८(४) आणि माहिती तंत्रज्ञान कायद्याच्या कलम ६६(सी) व ६६(डी) अन्वये गुन्हा नोंदवला आहे.CRIME NEWS

हा फसवणुकीचा प्रकार ९ फेब्रुवारी ते १३ फेब्रुवारी २०२६ या कालावधीत ऑनलाईन माध्यमाद्वारे घडला असून, प्राथमिक चौकशी आणि तांत्रिक विश्लेषणानंतर पोलिसांनी याप्रकरणी अधिकृत गुन्हा दाखल केला आहे.

पोलिसांनी दिलेल्या सविस्तर माहितीनुसार, फिर्यादी ७८ वर्षीय वृद्ध नागरिक हे सिंहगड रस्ता परिसरात वास्तव्यास असून, त्यांचे एका नामांकित बँकेत खाते आहे. गेल्या फेब्रुवारी महिन्याच्या सुरुवातीला त्यांच्या वैयक्तिक मोबाईल क्रमांकावर एका अज्ञात सायबर भामट्याने संपर्क साधला. त्याने आपण बँकेचे अधिकृत प्रतिनिधी बोलत असल्याचे भासवले. त्याने फिर्यादी यांना बँकेचे व्यवहार सुलभ करण्यासाठी मोबाईलमध्ये अधिकृत ‘युनो ॲप’ डाऊनलोड करणे आणि बँक खाते अद्ययावत (अपडेट) करणे आवश्यक असल्याचे सांगितले. ज्येष्ठ नागरिकाला या ऑनलाईन तांत्रिक गोष्टींची पुरेशी माहिती नसल्यामुळे त्यांनी समोरील व्यक्तीवर विश्वास ठेवला.CRIME NEWS

सायबर भामट्याने फिर्यादी यांना मोबाईलवर एक इंटरनेट लिंक पाठवली आणि त्या लिंकद्वारे एक ॲप डाऊनलोड करण्यास सांगितले. फिर्यादींनी त्या लिंकवर क्लिक करून ते ॲप डाऊनलोड करताच, आरोपीने त्यांच्या संपूर्ण मोबाईलचा दूरस्थ ताबा (रिमोट ॲक्सेस) मिळवला. मोबाईलचा ताबा मिळताच चोराने फिर्यादी यांच्या नकळत त्यांच्या बँक खात्याचे युझर आयडी, पासवर्ड आणि आलेले गोपनीय ओटीपी क्रमांक मिळवून बँक खात्यातून तब्बल ९ लाख ९३ हजार ७७२ रुपयांची रक्कम वेगवेगळ्या अनोळखी बँक खात्यांवर वर्ग केली. बँक खात्यातून मोठ्या प्रमाणात पैसे कमी झाल्याचे संदेश मोबाईलवर आल्यानंतर फिर्यादी यांना आपली फसवणूक झाल्याचे समजले.CRIME NEWS

सिंहगड रस्ता पोलीस ठाण्याचे पोलीस निरीक्षक (गुन्हे) श्री. समीर गायकवाड या गंभीर सायबर गुन्ह्याचा पुढील तपास करत आहेत.

CRIME NEWS