पिंपरी-चिंचवड शहरात जनगणना मोहिमेला वेग

१६ मे ते १४ जून दरम्यान ‘घर सूचीकरण’ टप्प्याची महापालिकेकडून प्रभावी अंमलबजावणी

पिंपरी : पिंपरी-चिंचवड औद्योगिक नगरीमध्ये आगामी राष्ट्रीय जनगणना २०२७ च्या पूर्वतयारीसाठी राबवण्यात येणाऱ्या गृहसूचीकरण प्रक्रियेने मोठा वेग घेतला आहे. पिंपरी-चिंचवड महानगरपालिकेच्या माध्यमातून संपूर्ण शहर परिसरात ‘घर सूचीकरण’ (हाऊस लिस्टिंग) टप्प्याची अंमलबजावणी अत्यंत प्रभावी आणि वेगाने सुरू करण्यात आली आहे.

केंद्र व राज्य शासनाच्या निर्देशानुसार ही संपूर्ण प्रक्रिया शनिवार (ता. १६) मे ते रविवार (ता. १४) जून २०२६ या निर्धारित कालावधीत यशस्वीपणे राबवली जात आहे. शहर नियोजनाच्या आणि लोककल्याणकारी योजनांच्या दृष्टीने अत्यंत महत्त्वपूर्ण मानल्या जाणाऱ्या या मोहिमेमध्ये नागरिकांनी सक्रिय सहभाग नोंदवून प्रशासनाला सहकार्य करावे, असे जाहीर आवाहन पिंपरी-चिंचवड महानगरपालिका प्रशासनाकडून करण्यात आले आहे.

जनगणनेची ही गुंतागुंतीची प्रक्रिया अत्यंत सुरळीत, त्रुटीरहित आणि काटेकोरपणे पार पाडण्यासाठी महानगरपालिकेचे वरिष्ठ अधिकारी व क्षेत्रीय स्तरावरील पथके विविध प्रभागांमध्ये थेट मैदानी पातळीवर जाऊन प्रत्यक्ष पाहणी आणि दैनंदिन कामकाजाचा आढावा घेत आहेत. या विशेष पाहणी दौऱ्यांदरम्यान प्रगणकांकडून माहिती संकलित करण्याची अचूकता, डिजिटल प्रणालीचा वापर आणि संकलित केल्या जाणाऱ्या विदा गुणवत्तेची (डेटा क्वालिटी) कसून तपासणी केली जात आहे. केवळ तांत्रिक कामकाज न तपासता अधिकारी स्वतः नागरिकांशी थेट संवाद साधून त्यांच्या शंकांचे निरसन करत आहेत आणि प्रगणकांना क्षेत्रीय स्तरावर काम करताना भेडसावणाऱ्या अडचणींवर जागीच आवश्यक त्या मार्गदर्शक सूचना व मार्गदर्शन करत आहेत.

सध्या पिंपरी-चिंचवड शहरातील कानाकोपऱ्यात महानगरपालिकेचे अधिकृत ओळखपत्र धारण केलेले प्रगणक आणि जनगणना कर्मचारी घराघरांना भेटी देऊन आवश्यक ती प्राथमिक माहिती गोळा करत आहेत. या पार्श्वभूमीवर, नागरिकांनी आपल्या घरी येणाऱ्या कर्मचाऱ्यांची ओळखपत्रे तपासून अधिकृततेची खात्री करावी आणि त्यांना विचारण्यात येणारी आवश्यक ती कौटुंबिक माहिती कसल्याही भीतीशिवाय आणि अत्यंत अचूकपणे उपलब्ध करून द्यावी. अचूक आणि पारदर्शक जनगणना हाच भविष्यातील शाश्वत शहर विकास, सुनियोजित नागरी पायाभूत सुविधांची उभारणी आणि लोककल्याणकारी व नागरिकाभिमुख सेवांचा भक्कम पाया ठरतो. त्यामुळे या राष्ट्रीय उपक्रमात कोणतीही व्यक्ती आणि कुटुंब सुटणार नाही, याची दक्षता घेऊन संपूर्ण पिंपरी-चिंचवडकरांनी या मोहिमेला आपले राष्ट्रीय कर्तव्य समजून उत्स्फूर्त सहकार्य करावे, असे आवाहन महापालिका प्रशासनाने केले आहे.