Virar Police: विरार पोलिसांची 'स्मार्ट' कामगिरी: हरवलेले 63 मोबाईल शोधून मालकांच्या स्वाधीन; 13 लाखांचा ऐवज परत

Virar Police Latest News : तांत्रिक विश्लेषणाच्या जोरावर देशाच्या कानाकोपऱ्यातून शोधले मोबाईल; विरार पोलिसांच्या कामगिरीचे सर्वत्र कौतुक

विरार :- विरार पोलीस ठाण्याच्या हद्दीतून मागील काही दिवसांत गहाळ (Missing) झालेल्या मोबाईल फोन्सचा तपास करून पोलिसांनी पुन्हा एकदा नागरिकांचा विश्वास सार्थ ठरवला आहे. विरार पोलीस ठाण्याच्या गुन्हे प्रकटीकरण पथकाने आपल्या तांत्रिक कौशल्याचा आणि बुद्धिमत्तेचा वापर करून, केवळ परिसरातूनच नव्हे तर देशातील विविध राज्यांतून तब्बल 63 हरवलेले मोबाईल फोन शोधून काढले आहेत. या मोबाईलची एकूण किंमत 13 लाख रुपये इतकी असून, हे सर्व फोन त्यांच्या मूळ मालकांना परत करण्यात आले आहेत. Virar Police Latest News

मोबाईलचा शोध कसा लागला?

विरार परिसरात मोबाईल गहाळ होण्याचे प्रमाण वाढल्याने पोलीस आयुक्त निकेत कौशिक आणि अप्पर पोलीस आयुक्त दत्तात्रय शिंदे यांनी या प्रकरणी विशेष सूचना दिल्या होत्या. त्यानुसार, विरार पोलिसांचे गुन्हे प्रकटीकरण पथक सक्रिय झाले. तांत्रिक माहिती (Technical Analysis) आणि सायबर सेलच्या मदतीने पोलिसांनी गहाळ झालेल्या प्रत्येक मोबाईलचा 'आयएमईआय' (IMEI) नंबर ट्रॅक करण्यास सुरुवात केली.

तपास करताना पोलिसांना हे मोबाईल फोन केवळ महाराष्ट्राच्या विविध जिल्ह्यांतच नव्हे, तर भारताच्या इतर राज्यांतही वापरले जात असल्याचे आढळून आले. पोलिसांनी अत्यंत चिकाटीने पाठपुरावा करून हे सर्व 63 फोन हस्तगत केले आणि ते त्यांच्या खऱ्या मालकांच्या हवाली केले.

पोलिसांच्या कामगिरीचे कौतुक

ही उल्लेखनीय कामगिरी पोलीस उप-आयुक्त सुहास बावचे आणि सहाय्यक पोलीस आयुक्त बजरंग देसाई यांच्या मार्गदर्शनाखाली पार पडली. विरार पोलीस ठाण्याचे वरिष्ठ पोलीस निरीक्षक एल. एम. तुरे आणि पोलीस निरीक्षक (गुन्हे) सुरेश गायकवाड यांच्या नेतृत्वाखालील गुन्हे प्रकटीकरण पथकातील सहाय्यक पोलीस निरीक्षक ज्ञानेश फडतरे, पोलीस उपनिरीक्षक ज्ञानेश्वर कोकाटे आणि त्यांच्या टीममधील इतर अंमलदारांनी दिवस-रात्र मेहनत करून हे कठीण काम यशस्वी केले.