Vasai Crime : प्रेमाचा बहाणा की चोऱ्यांचा फंडा? वसईतील 'बंटी-बबली'ची जोडी जेरबंद; 3 मोटारसायकल जप्त करत वालीव पोलिसांचा मास्टरस्ट्रोक!

Vasai Crime : वसई :- वसई पूर्व आणि पश्चिम परिसरातून एकापाठोपाठ एक अशा गाड्या लांबवून अक्षरशः धुमाकूळ घालणाऱ्या एका हायप्रोफाइल "बंटी-बबली" जोडीला वालीव पोलीस ठाण्याच्या गुन्हे प्रकटीकरण शाखेने बेड्या ठोकल्या आहेत. प्रेमाच्या आणि संसाराच्या नावाखाली ही जोडी शहरात वाहनचोरीचा धंदा चालवत होती. पोलिसांनी या जोडप्याकडून तब्बल 1 लाख रुपये किमतीची 3 चोरीची वाहने हस्तगत करत त्यांच्या कारनाम्यांचा पर्दाफाश केला आहे.https://maharashtramirror.com/Vasai Crime

पोलिसांनी दिलेल्या माहितीनुसार, तक्रारदार फैजान अहमद रियाज अहमद खान यांनी त्यांची टीव्हीएस कंपनीची अँटार्क मोटारसायकल वसई पूर्व येथील वलीव रोडवरील एका संकुलाच्या पार्किंगमध्ये उभी केली होती. तिथून ही गाडी चक्क शिताफीने पळवून नेण्यात आली होती. या प्रकरणी वलीव पोलीस ठाण्यात गुन्हा दाखल करण्यात आला होता. वाढत्या वाहनचोरीच्या घटनांमुळे सतर्क झालेल्या पोलिसांनी तांत्रिक विश्लेषण आणि सीसीटीव्ही फुटेजची चक्रं वेगाने फिरवली. या तपासात वसई पश्चिम परिसरातून महिला आरोपी बबीता अजय पाल (वय 25) आणि तिचा साथीदार सानू रज्जब कुरेशी (वय 23) यांना पोलिसांनी अगदी फिल्मी स्टाईलने जाळ्यात ओढले.

पोलिसांनी या "बंटी-बबली" जोडीला खाकीचा दणका दाखवत कसून चौकशी केली असता, त्यांनी वसई पूर्व आणि पश्चिम भागातून अशाच प्रकारे गाड्या चोरल्याची कबुली दिली. पोलिसांनी त्यांच्याकडून 1 लाख रुपयांचा मुद्देमाल जप्त करत तब्बल 3 वेगवेगळ्या गुन्ह्यांची उकल केली आहे. ही धडाकेबाज कामगिरी पोलीस अधिकारी व वलीव पोलिसांच्या पथकाने अत्यंत कौशल्यपूर्ण रीतीने पार पाडली असून, या जोडप्याच्या अटकेमुळे वाहन चोरांचे धाबे दणाणले आहेत.