Thane Traffic News : गुढीपाडवा स्वागतयात्रा: ठाणेकरांनो लक्ष द्या! गुरुवारी शहरात वाहतूक बदल; 'हे' मार्ग राहतील बंद

Thane Latest Traffic News : पहाटे 5 ते दुपारी 3 वाजेपर्यंत वाहतूक पोलिसांची नियमावली; मासुंदा तलाव आणि राम मारुती रोड परिसरात नो-पार्किंग

ठाणे :- गुढीपाडव्याच्या मुहूर्तावर ठाण्यात श्रीकौपिनेश्वर सांस्कृतिक न्यासाच्या वतीने निघणाऱ्या भव्य 'नववर्ष स्वागतयात्रे'साठी ठाणे शहर सज्ज झाले आहे. या यात्रेत हजारो नागरिक आणि लोकप्रतिनिधी सहभागी होणार असल्याने, शहरात मोठी वाहतूक कोंडी होऊ नये यासाठी ठाणे वाहतूक पोलिसांनी गुरुवारी विशेष अधिसूचना जारी केली आहे. हे बदल गुरुवारी पहाटे 5 ते दुपारी 3 वाजेपर्यंत लागू राहतील.

वाहतुकीसाठी बंद असलेले मार्ग आणि पर्यायी रस्ते

स्वागतयात्रेच्या मार्गावर पोलिसांनी खालीलप्रमाणे प्रवेशबंदी आणि वळण मार्ग निश्चित केले आहेत:

डॉ. मूस चौक ते साई कृपा उपाहारगृह: या मार्गावर डॉ. मूस चौक येथून प्रवेशबंदी असेल. वाहनधारकांनी जांभळीनाका आणि चिंतामणी चौक मार्गे प्रवास करावा.

राम मारुती रोड (गोखले रोडकडे): वंदना सिनेमागृहाजवळ या वाहनांना प्रवेशबंदी असेल. ही वाहने गजानन महाराज चौकातून डावे वळण घेऊन दगडी शाळा आणि चिंतामण ज्वेलर्स चौक मार्गे जातील.

गोखले रोड ते पु. ना. गाडगीळ चौक: मढवी हाऊस येथे प्रवेशबंदी असेल. वाहने केम्ब्रिज परिसर आणि घंटाळीदेवी मंदिर रोड मार्गे गजानन महाराज चौकाकडे वळवली जातील.

गडकरी चौक ते डॉ. मूस चौक: गडकरी चौकात प्रवेशबंदी असेल. वाहने दगडी शाळा आणि अल्मेडा चौक मार्गे मार्गस्थ होतील.

खोपट सिग्नल ते अल्मेडा रोड: वंदना सिनेमागृहाजवळ प्रवेशबंदी असेल. वाहने महापालिका चौक आणि नितीन कंपनी मार्गे प्रवास करू शकतील.

येथे असेल 'नो-पार्किंग' (वाहने उभी करण्यास मनाई)

गर्दी लक्षात घेता वाहतूक पोलीस उपायुक्त पंकज शिरसाट यांनी काही महत्त्वाच्या रस्त्यांवर दोन्ही बाजूंनी पार्किंग करण्यास मनाई केली आहे:

चिंतामणी चौक ते गडकरी चौक परिसर.

गजानन महाराज चौक ते गोखले रोड दरम्यानचा राम मारुती रोड.

साई कृपा उपाहारगृह ते भारतीय स्टेट बँक रस्ता.

स्वागतयात्रेचा उत्साह

श्रीकौपिनेश्वर मंदिरातून निघणाऱ्या या यात्रेला ठाण्यात मोठा ऐतिहासिक वारसा आहे. सुमारे 4 ते 5 हजार नागरिक पारंपरिक वेशभूषेत सहभागी होण्याची शक्यता असल्याने पोलिसांनी चोख बंदोबस्त ठेवला आहे. नागरिकांनी पोलिसांच्या सूचनांचे पालन करून सहकार्य करावे, असे आवाहन प्रशासनाकडून करण्यात आले आहे.