Thane Police News : 'हरवलेले मोबाईल सापडले': ठाणे पोलिसांचा 'मोबाईल महा-शोध'!

Thane Police Latest News : वर्तकनगर विभागाने तब्बल 105 स्मार्टफोन परत केले, नागरिकांच्या चेहऱ्यावर स्मितहास्य

ठाणे :- हरवलेला मोबाईल परत मिळणं म्हणजे एखाद्या चमत्कारासारखंच, पण ठाणे शहर पोलिसांच्या वर्तकनगर विभागाने हा चमत्कार खऱ्या अर्थाने घडवून दाखवला आहे! वर्तकनगर, कापूरबावडी, चितळसर आणि कासारवडवली पोलीस ठाण्यांनी केलेल्या एका धडाकेबाज कामगिरीमध्ये तब्बल 105 हरवलेले मोबाईल फोन शोधून ते त्यांच्या मूळ मालकांना सन्मानाने परत केले आहेत. या परत मिळालेल्या मोबाईलची एकत्रित किंमत 31 लाख 50 हजार रुपये इतकी आहे. पोलिसांच्या या 'टेक्नो-सर्च' मोहिमेने नागरिकांचा पोलिसांवरील विश्वास आणखी वाढवला आहे. Thane Police Latest News

तंत्रज्ञानाचा वापर, नागरिकांचा फायदा

पोलिसांना दररोज गहाळ मोबाईलच्या अनेक तक्रारी येत असतात, ज्या 'प्रॉपर्टी मिसिंग' म्हणून नोंदवल्या जातात. हरवलेल्या मोबाईलचे वाढते प्रमाण लक्षात घेऊन, सहायक पोलीस आयुक्त, वर्तकनगर विभाग, श्री. मंदार जावळे यांनी एक विशेष मोहीम हाती घेण्याचे आदेश दिले. 'CEIR (Central Equipment Identity Register) पोर्टल' चा प्रभावी वापर करत, तांत्रिक विश्लेषणाच्या आधारे जास्तीत जास्त मोबाईल शोधून काढण्याचे उद्दिष्ट ठेवण्यात आले.

या मोहिमेअंतर्गत, वर्तकनगर पोलीस स्टेशनने सर्वाधिक 35 मोबाईल, कापूरबावडी पोलीस स्टेशनने 20 मोबाईल, चितळसर पोलीस स्टेशनने 25 मोबाईल आणि कासारवडवली पोलीस स्टेशनने 25 मोबाईल असे मिळून एकूण 105 मोबाईल फोन शोधून काढले. विशेष म्हणजे, हे मोबाईल फक्त ठाणे किंवा मुंबईतूनच नव्हे, तर गुजरात, उत्तर प्रदेश, बिहार, दिल्ली, आसाम, तामिळनाडू आणि देशातील इतरही विविध राज्यांतून मिळवण्यात आले आहेत. आज एका विशेष कार्यक्रमात, वरिष्ठांच्या हस्ते हे मोबाईल तक्रारदार नागरिकांना सुपूर्द करण्यात आले. त्यांच्या चेहऱ्यावरचा आनंद पोलिसांच्या या कामगिरीचे यथार्थ वर्णन करत होता.

या कौतुकास्पद कामगिरीमध्ये पोलीस आयुक्त, ठाणे शहर, आशुतोष डुंबरे, पोलीस सह आयुक्त डॉ. ज्ञानेश्वर चव्हाण, अपर पोलीस आयुक्त, पश्चिम प्रादेशिक विभाग विनायक देशमुख, पोलीस उप आयुक्त, परिमंडळ-5 प्रशांत कदम आणि सहायक पोलीस आयुक्त, वर्तकनगर विभाग मंदार जावळे यांचे मोलाचे मार्गदर्शन लाभले. तसेच, वर्तकनगर, कापूरबावडी, चितळसर आणि कासारवडवली पोलीस स्टेशनच्या वरिष्ठ पोलीस निरीक्षकांच्या नेतृत्वाखालील अधिकारी आणि कर्मचाऱ्यांनी केलेल्या कठोर परिश्रमामुळेच हे मोठे यश साध्य झाले आहे. ही मोहीम भविष्यातही सुरू राहील, असे संकेत पोलिसांनी दिले आहेत.