Thane News : स्वतःच्याच पोटच्या लेकीचा सौदा! कल्याण शिळ रस्त्यावर ठाणे पोलिसांची धाड; वेश्या व्यवसाय चालवणाऱ्या 'बंटी-बबली' दलालांना बेड्या, 2 अल्पवयीन मुलींची सुटका

Thane News : ठाणे :- कल्याण-शिळ रस्त्यावरील डायघर गावाजवळ असलेल्या एका हॉटेलच्या नावाखाली अल्पवयीन मुलींना जाळ्यात ओढून त्यांच्याकडून जबरीने वेश्या व्यवसाय करून घेणाऱ्या एका पुरुष व महिला दलालाच्या जोडीला ठाणे पोलिसांच्या गुन्हे शाखेने बेड्या ठोकल्या आहेत. अत्यंत चटका लावणारी बाब म्हणजे अटक करण्यात आलेली महिला दलाल ही सुटका करण्यात आलेल्या एका पीडित अल्पवयीन मुलीची सख्खी आई असल्याचे तपासात उघड झाले आहे! पोलिसांच्या अनैतिक मानवी वाहतूक प्रतिबंध कक्षाने (AHTU) रचलेल्या जाळ्यात हे दोघेही अडकले असून, त्यांच्या तावडीतून 2 अल्पवयीन पीडित मुलींची सुरक्षित सुटका करण्यात आली आहे.https://maharashtramirror.com/ Thane News

अनैतिक मानवी वाहतूक प्रतिबंध कक्षाच्या सहाय्यक पोलीस निरीक्षक अंजली आंधळे यांना कल्याण-शिळ रोडवरील 'शुभम फॅमिली रेस्टॉरंट अँड बार' येथे अल्पवयीन मुलींना फूस लावून वेश्या व्यवसायासाठी आणले जाणार असल्याची गुप्त माहिती मिळाली होती. या माहितीच्या आधारे 16 ऑक्टोबर 2026 रोजी सायंकाळी पोलिसांनी सापळा रचून धाड टाकली. यावेळी घटनास्थळावरून वेश्या व्यवसाय चालवणारा पुरुष दलाल आणि त्याची पार्टनर महिला दलाल या दोघांना रंगेहात ताब्यात घेण्यात आले. या कारवाईदरम्यान आरोपींच्या तावडीतून 2 असहाय्य अल्पवयीन मुलींची सुटका करण्यात आली.

याप्रकरणी 17 ऑक्टोबर 2026 रोजी पहाटे डायघर पोलीस ठाण्यात भारतीय न्याय संहिता (BNS) 2023 मधील कलम 143(1), 143(3), 3(5), बालकांचे लैंगिक अपराधांपासून संरक्षण (POCSO) कायदा 2012 चे कलम 17, 18 आणि अनैतिक व्यापार प्रतिबंध कायद्यान्वये गुन्हा दाखल करण्यात आला आहे. सुटका करण्यात आलेल्या दोन्ही अल्पवयीन मुलींना शासकीय निरीक्षण बालसुधारगृह, उल्हासनगर-5 येथे सुरक्षित ठेवण्यात आले आहे. ही धडाकेबाज कारवाई पोलीस उपायुक्त अमरसिंह जाधव, सहाय्यक पोलीस आयुक्त मदन बल्लाळ यांच्या मार्गदर्शनाखाली सहाय्यक पोलीस निरीक्षक अंजली आंधळे, स्नेहल शिंदे व त्यांच्या पथकाने यशस्वीरित्या पार पाडली.