शुक्रवार पेठेत मालकाची नजर चुकवून नोकराने १० लाखांची रोकड लांबवली

गंगाधाम चौक परिसरात राहणाऱ्या एका ५७ वर्षीय व्यापाऱ्याची फिर्याद

पुणे: शुक्रवार पेठेतील एका किराणा भुसार मालाच्या दुकानात काम करणाऱ्या नोकरानेच मालकाचा विश्वासघात केल्याचा धक्कादायक प्रकार उघडकीस आला आहे. मालकाची नजर चुकवून ऑफिसमधील बॅगेत ठेवलेली १० लाख रुपयांची रोकड घेऊन नोकर पसार झाला आहे. याप्रकरणी खडक पोलीस ठाण्यात गुन्हा दाखल करण्यात आला असून, पोलीस आरोपीचा शोध घेत आहेत.

मिळालेल्या माहितीनुसार, गंगाधाम चौक परिसरात राहणाऱ्या एका ५७ वर्षीय व्यापाऱ्याने यासंदर्भात फिर्याद दिली आहे. फिर्यादी यांचे शुक्रवार पेठेतील १८३, विजय प्रोव्हिजन स्टोअर्स नावाचे किराणा भुसार मालाचे दुकान आहे. मंगळवारी (ता. १४) सायंकाळी साडेपाचच्या सुमारास ही घटना घडली. दुकानाच्या ऑफिसमध्ये व्यापाऱ्याने एका बॅगेत १० लाख रुपयांची रोकड ठेवली होती.

दुकानात कामाला असलेल्या एका नोकराने व्यापाऱ्याचे लक्ष नसल्याची संधी साधली. त्याने अत्यंत शिताफीने ऑफिसमध्ये प्रवेश करून पैशांची बॅग चोरली आणि तिथून पळ काढला. काही वेळानंतर व्यापाऱ्याने पैशांची बॅग तपासली असता, ती गायब असल्याचे त्यांच्या निदर्शनास आले. दुकानातील नोकरही बेपत्ता असल्याने त्यानेच ही चोरी केल्याचे स्पष्ट झाले. भरवस्तीत आणि वर्दळीच्या ठिकाणी असलेल्या दुकानातून १० लाखांची रोकड चोरीला गेल्याने खळबळ उडाली आहे.

खडक पोलिसांनी याप्रकरणी भारतीय न्याय संहिता (BNS) कलम ३०६ नुसार गुन्हा दाखल केला आहे. सहायक पोलीस उपनिरीक्षक अर्जुन कुदळे या प्रकरणाचा अधिक तपास करत आहेत. आरोपी नोकराचे पूर्ण नाव आणि पत्ता शोधण्याचे काम सुरू असून, रेल्वे स्थानक आणि बस स्थानक परिसरातील सीसीटीव्ही चित्रीकरण तपासले जात आहे.

Servant steals Rs 10 lakh cash from owner in Shukrawar Peth