Sanjay Raut : "युद्ध सीमेवर आले असताना सरकार शांत का?"; संजय राऊत यांचा केंद्र सरकारवर घणाघाती हल्ला

Sanjay Raut On International War : आंतरराष्ट्रीय संघर्षावरून संसदेत चर्चेची मागणी; तर अजित पवार विमान अपघात प्रकरणावरून सुनेत्रा पवारांना दिला 'हा' सल्ला

नवी दिल्ली :- भारताच्या शेजारील देशांमध्ये आणि मध्य पूर्वेतील वाढत्या युद्धजन्य परिस्थितीवरून शिवसेना (उद्धव बाळासाहेब ठाकरे) पक्षाचे खासदार संजय राऊत यांनी केंद्र सरकारवर जोरदार प्रहार केला आहे. आंतरराष्ट्रीय संकट भारताच्या सीमेपर्यंत येऊन ठेपले असताना सरकार संसदेत चर्चा का टाळत आहे, असा सवाल त्यांनी उपस्थित केला आहे.

"केवळ शांततेची भाषा करून चालणार नाही"

परराष्ट्र मंत्री एस. जयशंकर यांच्या भूमिकेवर टीका करताना संजय राऊत म्हणाले की, "आसपासच्या प्रदेशात अस्थिरता वाढत असताना केवळ शांततेचे भाष्य पुरेसे नाही. भारतावर याचे काय परिणाम होतील, यावर संसदेत सविस्तर चर्चा व्हायला हवी. संघर्ष सुरू होण्यापूर्वी पंतप्रधान मोदी इस्रायलमध्ये काय करत होते?" असा प्रश्नही त्यांनी विचारला. देशाच्या सुरक्षेशी संबंधित या मुद्द्यावर सरकारने आपली भूमिका स्पष्टपणे मांडली पाहिजे, अशी मागणी त्यांनी केली आहे.

अजित पवार विमान अपघात प्रकरण: "अहवाल येईल, हे उत्तर पुरेसे नाही"

दिवंगत नेते अजित पवार यांच्या विमान अपघाताबाबत आमदार रोहित पवार यांनी उपस्थित केलेल्या संशयावर राऊत यांनी भाष्य केले. या प्रकरणात उपमुख्यमंत्री सुनेत्रा पवार यांना सल्ला देताना ते म्हणाले की:

"तपास यंत्रणांचा अहवाल येईल तेव्हा बोलू, असे उपमुख्यमंत्री म्हणून म्हणणे ठीक आहे. मात्र, एक पत्नी म्हणून तुम्ही आवाज उठवायला हवा."

या अपघाताबाबत असलेल्या संशयाची गंभीर चौकशी होणे आवश्यक आहे.

मुख्यमंत्री देवेंद्र फडणवीस स्मारकाबद्दल बोलतात ते चांगलेच आहे, पण त्यापेक्षा मृत्यूच्या कारणांमधील सत्य समोर येणे अधिक महत्त्वाचे आहे.

व्ही. के. सिंग आणि सीबीआय चौकशीवर प्रश्नचिन्ह

विमान कंपनीचे मालक व्ही. के. सिंग यांना वाचवण्याचा प्रयत्न होत असल्याचा आरोप करत राऊत यांनी सवालांची सरबत्ती केली. "सीबीआय चौकशीला इतका विलंब का लागतो? व्ही. के. सिंग भाजपचे सदस्य आहेत का? त्यांनी पक्षाला निधी दिला आहे का?" असे प्रश्न त्यांनी विचारले. तसेच, देशातील नेत्यांना पंतप्रधानांसारखी सुरक्षित विमाने मिळत नाहीत, मग सामान्य लोकांनी जीव धोक्यात घालून प्रवास करायचा का, असा संतप्त सवालही त्यांनी यावेळी केला.