Sanjay Raut : "नाल्यातून गॅस काढण्याच्या मोदींच्या संशोधनाची आताच खरी गरज"; संजय राऊतांचा केंद्र सरकारवर 'धारदार' टोला

Sanjay Raut On PM Modi : इराण-इस्रायल युद्धामुळे उद्योग कोलमडले; मिठी नदीवर गॅस निर्मितीचा प्रकल्प सुरू करा, राऊतांची उपरोधिक टीका

मुंबई :- पश्चिम आशियातील इराण, इस्रायल आणि अमेरिका यांच्यातील युद्धाचा वणवा आता थेट महाराष्ट्राच्या औद्योगिक पट्ट्यात पोहोचला आहे. होर्मुझची सामुद्रधुनी बंद झाल्याने राज्यात निर्माण झालेल्या भीषण इंधन टंचाईवरून शिवसेना (उद्धव बाळासाहेब ठाकरे) नेते आणि खासदार संजय राऊत यांनी पंतप्रधान नरेंद्र मोदी आणि केंद्र सरकारवर बोचरी टीका केली आहे. "पंतप्रधानांनी शोधलेल्या 'नाल्यातून गॅस निर्मिती'च्या विज्ञानाचा वापर करण्याची हीच ती वेळ आहे," असा खोचक टोला त्यांनी लगावला.

औद्योगिक 'हब' संकटात

राज्यातील उद्योगधंद्यांच्या सद्यस्थितीवर चिंता व्यक्त करताना राऊत म्हणाले की, सातारा, सांगली आणि कोल्हापूर येथील इंजिनिअरिंग प्लांट्स, तसेच छत्रपती संभाजीनगर आणि चाकणचे ऑटोमोबाईल हब गॅसअभावी ठप्प होत आहेत. हॉटेल व्यावसायिक, कष्टकरी आणि टाईल्स उत्पादक या संकटात भरडले जात आहेत. ही परिस्थिती देशाला 100 वर्षे मागे घेऊन जाणारी असल्याचा आरोपही त्यांनी केला.

"मिठी नदीवर प्रायोगिक प्रकल्प सुरू करा"

पंतप्रधानांच्या जुन्या विधानाचा संदर्भ देत राऊत यांनी उपरोधिक सल्ला दिला:

मोदींचे संशोधन: "पंतप्रधान मोदी हे मोठे संशोधक आहेत. नाल्यात पाईप टाकून गॅस काढता येतो, असे त्यांनीच सांगितले होते. आता देशावर इंधन संकट असताना त्यांच्या या विज्ञानाचा देशाला फायदा व्हायला हवा."

मिठी नदीचा प्रयोग: "मुंबईतील मिठी नदीच्या किनाऱ्यावर या संशोधनाचा पहिला पथदर्शी प्रकल्प सुरू करावा. मुख्यमंत्री आणि उपमुख्यमंत्र्यांनी यासाठी मोदींना आवर्जून बोलवावे. या प्रकल्पासाठी लागणारे पाईप्स शिवसेना पुरवायला तयार आहे."

यमुनेचा पर्याय: मिठी नदीचा प्रयोग यशस्वी झाला की दिल्लीतील यमुना नदीवरही असाच प्रयोग करता येईल, असेही त्यांनी नमूद केले.

"बैलगाडी युग परत येईल की काय?"

केंद्र सरकारच्या धोरणांमुळे गाड्या रस्त्यावर धावण्याऐवजी पुन्हा एकदा 'बैलगाड्यांचे युग' येईल की काय, अशी भीती राऊतांनी व्यक्त केली. "राज्यात परिस्थिती इतकी गंभीर असताना मोदी आणि त्यांचे भक्त यावर एक शब्दही बोलायला तयार नाहीत," अशी टीका करत त्यांनी सरकारला धारेवर धरले.