PUNE NEWS : आयएलएस लॉ कॉलेज रॅगिंग प्रकरणात राष्ट्रीय अनुसूचित जाती आयोगाची एन्ट्री

प्राचार्य आणि पुणे पोलीस आयुक्तांना नोटीस

विहित मुदतीत माहिती न दिल्यास भारतीय संविधानाच्या कलम ३३८ अंतर्गत असलेल्या अधिकारांचा वापर करून समन्स बजावण्यात येईल, असा इशारा

पुणे PUNE NEWS: पुण्यातील इंडियन लॉ सोसायटीज लॉ कॉलेज (आयएलएस लॉ कॉलेज) येथे घडलेल्या रॅगिंग प्रकरणाने आता नवे वळण घेतले आहे. कॉलेजमधील एका विद्यार्थ्याने केलेल्या तक्रारीनंतर पाच विद्यार्थ्यांविरोधात गुन्हा दाखल करण्यात आला होता. मात्र, प्रकरणात कॉलेज प्रशासनाची भूमिका आणि प्राचार्यांवर कोणतीही फौजदारी कारवाई न झाल्याबाबत प्रश्न उपस्थित झाल्यानंतर राष्ट्रीय अनुसूचित जाती आयोग यांनी स्वतःहून दखल घेत तपास सुरू केला आहे.PUNE NEWS

आयोगाने पुणे शहराचे पोलीस आयुक्त अमितेश कुमार आणि लॉ कॉलेजच्या प्राचार्या दीपा पातूरकर यांना नोटीस बजावून प्रकरणातील कारवाईचा सविस्तर अहवाल मागविला आहे. विहित मुदतीत माहिती न दिल्यास भारतीय संविधानाच्या कलम ३३८ अंतर्गत असलेल्या अधिकारांचा वापर करून समन्स बजावण्यात येईल, असा इशाराही आयोगाने दिला आहे.

काय आहे प्रकरण?
डेक्कन पोलीस ठाण्यात एप्रिल २०२६ मध्ये दाखल झालेल्या गुन्ह्यानुसार, या विधी महाविद्यालयातील एका ३५ वर्षीय द्वितीय वर्ष एलएलबी विद्यार्थ्याने तक्रार दिली होती. त्याच्या म्हणण्यानुसार, ऑक्टोबर ते डिसेंबर २०२४ या कालावधीत कॉलेजच्या मुलांच्या वसतिगृहात त्याला पाच सहाध्यायी विद्यार्थ्यांकडून मानसिक छळ, धमक्या, अपमानास्पद वागणूक आणि रॅगिंगचा सामना करावा लागला.PUNE NEWS

तक्रारदार विद्यार्थ्याने सुरुवातीला कॉलेज प्रशासनाकडे तक्रार केली होती. त्यानंतर त्याने विद्यापीठ अनुदान आयोगाच्या अँटी-रॅगिंग यंत्रणेकडेही दाद मागितली. दीर्घ पाठपुराव्यानंतर अखेर २५ एप्रिल २०२६ रोजी पाच विद्यार्थ्यांविरोधात महाराष्ट्र रॅगिंग प्रतिबंधक कायद्याच्या कलम ३ आणि ४ अंतर्गत गुन्हा दाखल करण्यात आला.

तक्रारदाराचा आरोप काय?
तक्रारदाराच्या म्हणण्यानुसार, त्याला सातत्याने मानसिक त्रास देण्यात आला. काही विद्यार्थ्यांनी त्याची चेष्टा करणे, अपमान करणे आणि दबाव आणणे असे प्रकार केल्याचा आरोप करण्यात आला आहे. तसेच काही आरोपी विद्यार्थ्यांच्या कथित मद्यपानासंदर्भात माहिती दिल्यानंतर त्याला लक्ष्य करण्यात आल्याचाही दावा तक्रारीत करण्यात आला आहे.PUNE NEWS

कॉलेज प्रशासनाची भूमिका
प्राचार्या डॉ. दीपा पातूरकर यांनी यापूर्वी माध्यमांशी बोलताना हा वाद वसतिगृहातील विद्यार्थ्यांमधील अंतर्गत मतभेदातून निर्माण झाल्याचे म्हटले होते. कॉलेजच्या अँटी-रॅगिंग समितीने चौकशी करून युजीसीला अहवाल सादर केला होता. त्या चौकशीत रॅगिंग झाल्याचे प्रथमदर्शनी पुरावे आढळले नसल्याने कोणतीही शिस्तभंगाची कारवाई करण्यात आली नव्हती, असा दावा कॉलेज प्रशासनाने केला होता.PUNE NEWS

आयोगाने का घेतली दखल?
पाच विद्यार्थ्यांविरोधात एफआयआर दाखल झाल्यानंतरही कॉलेज प्रशासन आणि प्राचार्यांच्या भूमिकेची स्वतंत्र चौकशी झाली का? तक्रारीवर योग्यवेळी कारवाई का झाली नाही? तसेच अनुसूचित जातीच्या विद्यार्थ्याशी संबंधित कोणत्याही भेदभावाचा मुद्दा होता का? याबाबत आयोगाने गंभीर प्रश्न उपस्थित केले आहेत. याच पार्श्वभूमीवर आयोगाने पोलीस आणि कॉलेज प्रशासनाकडून तपशीलवार अहवाल मागविला आहे.PUNE NEWS

पुढे काय?
राष्ट्रीय अनुसूचित जाती आयोगाने या प्रकरणाचा स्वतंत्र तपास सुरू केला असून पुणे पोलीस आणि कॉलेज प्रशासनाकडून अहवाल आल्यानंतर पुढील सुनावणी आणि चौकशीची दिशा निश्चित होणार आहे. आयोगाच्या तपासानंतर प्राचार्यांसह इतर जबाबदार व्यक्तींविरोधात पुढील कारवाईची शक्यता नाकारता येत नाही.

PUNE NEWS