Navi Mumbai: नवी मुंबईत 'हिंद-दी-चादर' सोहळ्याचा जागर! 20 लाख भाविक येण्याची शक्यता; पंतप्रधान मोदींचा 'ऑनलाईन' सहभाग, तर अमित शहांच्या उपस्थितीवर प्रश्नचिन्ह

Navi Mumbai Hindi Di Chadar : खारघरच्या ओवे मैदानात 28 फेब्रुवारी आणि 1 मार्चला भव्य आयोजन | देशभरातील मुख्यमंत्र्यांची मांदियाळी | वाहतुकीत मोठे बदल, अवजड वाहनांना बंदी

नवी मुंबई :- ज्यांच्या बलिदानाने भारताची संस्कृती आणि धर्म सुरक्षित राहिला, त्या 'हिंद-दी-चादर' श्री गुरू तेग बहादुर साहिब जी यांच्या 350 व्या शहिदी समागमाच्या निमित्ताने नवी मुंबईतील खारघर येथे एक अभूतपूर्व सोहळा रंगणार आहे. तब्बल 18 ते 20 लाख भाविक या महाकुंभात सहभागी होण्याची शक्यता असून, खारघरचे ओवे मैदान या ऐतिहासिक क्षणाचे साक्षीदार होणार आहे. Navi Mumbai Latest News

पंतप्रधान मोदींचा 'डिजिटल' संदेश

या सोहळ्याचे मुख्य आकर्षण म्हणजे पंतप्रधान नरेंद्र मोदी यांची उपस्थिती. मात्र, सुरक्षेच्या आणि तांत्रिक कारणास्तव पंतप्रधान मोदी आता नवी मुंबईत प्रत्यक्ष न येता 'दूरदृष्य प्रणाली' (ऑनलाईन) द्वारे या कार्यक्रमाला संबोधित करणार आहेत. दुसरीकडे, केंद्रीय गृहमंत्री अमित शहा या कार्यक्रमाला प्रत्यक्ष उपस्थित राहणार की नाही, याबाबत अजूनही साशंकता कायम असल्याने सर्वांच्या नजरा त्यांच्या दौऱ्याकडे लागल्या आहेत.

देशभरातील मुख्यमंत्र्यांची मांदियाळी

पंतप्रधानांचा व्हर्च्युअल सहभाग असला तरी, प्रत्यक्ष मैदानावर मात्र व्हीव्हीआयपी पाहुण्यांची मोठी रांग लागणार आहे. उत्तर प्रदेशचे मुख्यमंत्री योगी आदित्यनाथ, गुजरातचे मुख्यमंत्री भूपेंद्रभाई पटेल, हरियाणाचे नायब सिंह सैनी यांच्यासह 8 राज्यांचे मुख्यमंत्री आणि विविध धर्मपीठांचे पीठाधीश्वर या सोहळ्याला उपस्थित राहणार आहेत. महाराष्ट्राचे मुख्यमंत्री देवेंद्र फडणवीस आणि उपमुख्यमंत्री या सोहळ्याचे यजमानपद भूषवणार आहेत.

भव्य तयारी आणि कडक शिस्त

लंगर आणि निवास: अंदाजे 2.5 लाख लोकांसाठी लंगरची सोय करण्यात आली असून, 25 हजार भाविकांच्या निवासाची तात्पुरती व्यवस्था खारघरमध्ये केली आहे.

सुरक्षा कवच: 3000 हून अधिक पोलीस कर्मचारी आणि हजारो स्वयंसेवक या गर्दीवर नियंत्रण ठेवण्यासाठी तैनात आहेत. 300 पेक्षा जास्त सीसीटीव्ही कॅमेऱ्यांद्वारे प्रत्येक हालचालीवर लक्ष ठेवले जाणार आहे.

वाहतुकीचा मास्टर प्लॅन: सायन-पनवेल हायवेवर अवजड वाहनांना बंदी घालण्यात आली असून 38 नवीन पार्किंग झोन तयार करण्यात आले आहेत. भाविकांच्या प्रवासासाठी 150 पेक्षा जास्त विशेष बसगाड्यांची सोय प्रशासनाने केली आहे.

सांस्कृतिक वारसा आणि आधुनिक तंत्रज्ञान

यावेळच्या सोहळ्याचे वैशिष्ट्य म्हणजे गुरूंच्या बलिदानाचा इतिहास सांगणारा एक विशेष 'AI-जनरेटेड' म्युझिक व्हिडिओ देखील लाँच करण्यात आला आहे. नवीन पिढीला गुरूंच्या बलिदानाची महती कळावी, हा यामागील मुख्य उद्देश आहे.