Navi Mumbai Airport : नवी मुंबई आंतरराष्ट्रीय विमानतळाचे 'उन्हाळी वेळापत्रक' जाहीर; 29 मार्चपासून देशातील 30 शहरांशी थेट संपर्क!

Navi Mumbai Airport Time Table : आता 46 शहरांपर्यंत पोहोचता येणार; दररोज 156 उड्डाणांचे नियोजन आणि इंडिगो, आकासा एअरची अतिरिक्त सेवा

नवी मुंबई :- नवी मुंबई आंतरराष्ट्रीय विमानतळावरून (NMIA) प्रवास करणाऱ्या प्रवाशांसाठी एक अत्यंत आनंदाची बातमी आहे. येत्या 29 मार्चपासून हे विमानतळ देशातील आणखी 30 महत्त्वाच्या शहरांना जोडले जाणार असून, विमानतळ कंपनीने गुरुवारी याचे अधिकृत प्रसिद्धीपत्रक जारी केले आहे. उन्हाळी सुट्ट्यांचा हंगाम लक्षात घेऊन 29 मार्च ते 24 ऑक्टोबर या कालावधीसाठी हे विशेष 'उन्हाळी वेळापत्रक' तयार करण्यात आले आहे.

प्रमुख शहरांसाठी उड्डाणांचा धडाका

व्यापारी, पर्यटन आणि धार्मिक दृष्टिकोनातून महत्त्वाच्या असलेल्या शहरांसाठी उड्डाणांची संख्या मोठ्या प्रमाणात वाढवण्यात आली आहे.

दिल्ली: दररोज 9 उड्डाणे

गोवा: दररोज 7 उड्डाणे

बेंगळुरू: दररोज 6 उड्डाणे

कोची: दररोज 5 उड्डाणे
याशिवाय हैदराबाद, कोलकाता, लखनौ, वाराणसी आणि इंदूर या शहरांसाठीही नियमित सेवा उपलब्ध असेल.

'या' 30 शहरांसाठी सुरू होणार सेवा

आग्रा, औरंगाबाद, अयोध्या, बागडोगरा, बरेली, बेळगाव, भावनगर, भोपाळ, चंदीगड, डेहराडून, दिऊ, दुर्गापूर, गोवा (डाबोळीम), गोरखपूर, हिंडन, राजकोट (हिरा सर), हुबळी, जबलपूर, जम्मू, झारसुगुडा, कन्नूर, कोल्हापूर, मदुराई, कोलकाता, पटना, रायपूर, श्रीनगर, तिरुपती, तिरुवनंतपुरम आणि विशाखापट्टणम.

उड्डाणांच्या संख्येत मोठी वाढ

विमानतळावरून दर आठवड्याला सुमारे 1,092 उड्डाणे होण्याचा अंदाज आहे, म्हणजेच दररोज सरासरी 156 उड्डाणे होतील. सुरुवातीला दररोज केवळ 22 उड्डाणे होती, ती एप्रिल महिन्यापर्यंत 78 वरून थेट 156 पर्यंत नेण्याचे उद्दिष्ट ठेवण्यात आले आहे. इंडिगो, आकासा एअर आणि एअर इंडिया एक्सप्रेस या कंपन्या आपली अतिरिक्त विमाने या मार्गावर चालवणार आहेत.

मुंबई विमानतळावरील ताण होणार कमी

नवी मुंबई विमानतळाच्या या विस्तारामुळे छत्रपती शिवाजी महाराज आंतरराष्ट्रीय विमानतळावरील (CSMIA) प्रवाशांचा भार लक्षणीयरीत्या कमी होईल. विशेषतः टियर-2 शहरांना थेट जोडणी मिळाल्याने प्रवाशांचा वेळ आणि पैसा दोन्ही वाचणार आहे. पूर्ण क्षमतेने सुरू झाल्यानंतर हे विमानतळ दरवर्षी सुमारे 9 कोटी प्रवाशांची हाताळणी करण्यास सक्षम असेल.