Mumbai Transport News : मुंबईत वाहतूकदारांचा 'इंकलाब'! ई-चलनाविरोधात हजारो वाहने आझाद मैदानात धडकणार; "ही तर सरकारची डिजिटल रॉबरी", संघटनांचा घणाघात

Mumbai Transport Latest News : पोलिसांना वसुलीचे 'टार्गेट' दिले जात असल्याचा आरोप | 40 हजार बसेससह 300 संघटनांचा संपात सहभाग | मुंबई महानगरात आज भीषण वाहतूक कोंडीची शक्यता

मुंबई :- राज्यातील ई-चलन प्रणाली आणि त्याद्वारे वसूल केला जाणारा अवाढव्य दंड यांविरोधात महाराष्ट्र ट्रान्सपोर्ट ॲक्शन कमिटीने आज, 5 मार्च रोजी मुंबईत मोठ्या आंदोलनाची घोषणा केली आहे. "सरकारने महसूल वाढवण्यासाठी ई-चलनाला हत्यार बनवले आहे," असा आरोप करत हजारो वाहतूकदार आपल्या वाहनांसह आझाद मैदानात दाखल होत आहेत. या आंदोलनामुळे मुंबईतील रस्ते वाहतूक ठप्प होण्याची चिन्हे असून प्रशासनासमोर मोठे आव्हान उभे राहिले आहे.

महसूल वाढीसाठी 'टार्गेट'चा वापर?

ठाण्यातील पत्रकार परिषदेत बोलताना बस मालक संघटनेचे प्रवक्ते राजेंद्र पाटील आणि विजय यादव यांनी सरकारवर गंभीर आरोप केले. त्यांच्या मते, "ई-चलन हे केवळ वाहतूक शिस्तीसाठी नसून तो एक वसुलीचा व्यवसाय बनला आहे. प्रत्येक कॉन्स्टेबलला ठराविक केसेस करण्याचे टार्गेट दिले जात आहे. परिवहन मंत्री प्रताप सरनाईक यांनी समस्या मान्य केल्या आहेत, मात्र ठोस निर्णय घेण्यास ते असमर्थ ठरत आहेत."

"डिजिटल रॉबरी"चा आरोप
वाहतूकदार संघटनेचे पदाधिकारी के. व्ही. शेट्टी यांनी ई-चलन यंत्रणेच्या वैधतेवरच प्रश्नचिन्ह उपस्थित केले आहे. ते म्हणाले:

"ई-चलनासाठी वापरली जाणारी उपकरणे मान्यताप्राप्त नाहीत. अनेकदा पुराव्यासाठी जोडलेले छायाचित्र धुसर असते, तरीही वाहनधारकांवर सक्तीने दंड आकारला जातो. हा सरकारचा अधिकृत 'डिजिटल दरोडा' आहे. जोपर्यंत हे जाचक नियम रद्द होत नाहीत, तोपर्यंत आम्ही मागे हटणार नाही."

मुंबईकरांची कोंडी होणार?

आज आझाद मैदानावर केवळ वाहतूकदारच नाही, तर त्यांची वाहनेही मोठ्या संख्येने येणार असल्याने दक्षिण मुंबईसह मुख्य महामार्गांवर वाहतूक कोंडी होण्याची शक्यता आहे. 300 हून अधिक संघटना या आंदोलनात सहभागी झाल्या असल्याने शाळा बस, खाजगी ट्रॅव्हल्स आणि मालवाहू ट्रकचा मोठा ताफा रस्त्यावर उतरणार आहे.

वाहतूकदारांच्या प्रमुख मागण्या

1.ई-चलन प्रणाली तात्काळ रद्द करावी.

2.दंडाची सक्तीची वसुली थांबवावी.

3.पुराव्याशिवाय दाखल केलेले खोटे गुन्हे मागे घ्यावेत.

4.वाहतूक नियमावलीत सुसूत्रता आणावी.

परिवहन विभागाने मनधरणीचे प्रयत्न केले असले तरी, ठोस लेखी आश्वासन मिळाल्याशिवाय माघार घेणार नसल्याचा पवित्रा संघटनांनी घेतल्याने पेच वाढला आहे. आज संध्याकाळपर्यंत यावर तोडगा न निघाल्यास राज्यातील मालवाहतूक पूर्णपणे ठप्प होण्याचा धोका आहे.