Minster Dada Bhuse : शाळकरी मुलांचा जीव धोक्यात घालणाऱ्या अवैध वाहतुकीवर 'सर्जिकल स्ट्राईक'! विनापरवाना वाहने जप्त करण्याचे विधानसभा अध्यक्षांचे आदेश

Minster Dada Bhuse Take Action illegale Bus Driver : "विद्यार्थ्यांना वाहनांत कोंबले जाते!" शिक्षणमंत्री दादा भुसे यांची नियमांच्या प्रभावी अंमलबजावणीअभावी कबुली | रईस शेख यांच्या प्रश्नावर सभागृहात पडसाद | आता खासगी वाहनांसाठीही लागणार स्वतंत्र परवाना

मुंबई :- राज्यातील शालेय विद्यार्थ्यांची वाहतूक करणाऱ्या रिक्षा, ओम्नी आणि इतर खासगी वाहनांच्या मनमानी कारभारावर आज विधानसभेत सर्वपक्षीय आमदारांनी ताशेरे ओढले. अनेक ठिकाणी विद्यार्थ्यांचा अक्षरशः कोंडमारा करून त्यांना शाळेत नेले जाते, हे वास्तव समोर आल्यानंतर विधानसभा अध्यक्ष राहुल नार्वेकर यांनी कडक पवित्रा घेतला. विद्यार्थ्यांच्या सुरक्षेसाठी आता सर्व प्रकारच्या शालेय वाहतूक वाहनांसाठी स्वतंत्र परवाने (Permits) अनिवार्य करण्यात आले असून, नियमांचे उल्लंघन करणाऱ्या वाहनांवर जप्तीची कारवाई करण्याचे निर्देश त्यांनी दिले आहेत.

शिक्षणमंत्र्यांची प्रांजळ कबुली आणि सदस्यांचा संताप

आमदार रईस शेख यांनी उपस्थित केलेल्या प्रश्नावर चर्चा करताना शालेय शिक्षणमंत्री दादा भुसे यांनी एक महत्त्वाची कबुली दिली. "विद्यार्थ्यांच्या वाहतुकीसाठी कठोर कायदे अस्तित्वात आहेत, मात्र त्यांची प्रभावी अंमलबजावणी होत नाही, ही वस्तुस्थिती आहे," असे त्यांनी मान्य केले. यावेळी संजय मेश्राम, अभिमन्यू पवार आणि इतर सदस्यांनी परिवहन आणि शिक्षण विभागाच्या ढिसाळ कारभारावर जोरदार टीका केली. अनेक वाहने जुनी असून त्यांची निगा राखली जात नाही आणि क्षमतेपेक्षा दुप्पट मुले त्यात भरली जातात, याकडे त्यांनी लक्ष वेधले.

अध्यक्षांचे ऐतिहासिक निर्देश: काय बदलणार?

सभागृहातील सदस्यांचा संताप आणि विद्यार्थ्यांची सुरक्षितता लक्षात घेऊन अध्यक्ष राहुल नार्वेकर यांनी परिवहन विभागाला खालीलप्रमाणे निर्देश दिले आहेत.

स्वतंत्र परवाना सक्ती: केवळ स्कूल बसच नव्हे, तर खासगी गाड्या, ओम्नी आणि रिक्षा यांनाही शालेय वाहतुकीसाठी विशेष परवाना घ्यावा लागेल.

जप्तीची कारवाई: ज्या वाहनांकडे असा अधिकृत परवाना नसेल, ती वाहने केवळ दंड आकारून सोडली जाणार नाहीत, तर ती थेट जप्त केली जातील.

फिटनेस तपासणी: परिवहन विभागाने अशा सर्व वाहनांची नियमित तपासणी (Fitness Test) करावी आणि ती विद्यार्थ्यांसाठी सुरक्षित असल्याची खात्री करावी.

सरकारची भूमिका आणि पुढील पाऊल

शिक्षणमंत्री दादा भुसे यांनी आश्वासन दिले की, परिवहन विभागाशी समन्वय साधून शाळा व्यवस्थापन समिती आणि पालकांच्या मदतीने या वाहनांवर नियंत्रण मिळवले जाईल. नियमांचे पालन न करणाऱ्या चालकांविरुद्ध गुन्हे दाखल करण्याबाबतही विचार केला जाईल.