Chandrashekhar Bawankule : 'वेगळा विदर्भ' वादाने नागपूर अधिवेशन तापले! - बावनकुळेंच्या विधानानंतर मनसे, शिंदे गटाची तीव्र प्रतिक्रिया

•"स्वतंत्र विदर्भ हा भाजपचा अजेंडा!" - मंत्री चंद्रशेखर बावनकुळे; मनसे संतापली, "महाराष्ट्राचे तुकडे पडू देणार नाही," राज ठाकरेंच्या भूमिकेचा पुनरुच्चार

नागपूर :- महाराष्ट्र विधिमंडळाच्या हिवाळी अधिवेशनाच्या पहिल्याच दिवशी काँग्रेस नेते विजय वडेट्टीवार यांनी विदर्भाच्या मागासलेपणाचा उल्लेख करून स्वतंत्र विदर्भाचा मुद्दा उपस्थित केल्याने, राज्याच्या राजकारणात मोठी खळबळ उडाली आहे. राज्याचे महसूल मंत्री चंद्रशेखर बावनकुळे यांनी या चर्चेत उडी घेत, "वेगळा विदर्भ हा भाजपचा अजेंडा आहे आणि तो अजेंड्यातून बाहेर गेला नाही," असे ठाम विधान केले, ज्यामुळे हा वाद अधिक पेटला.

बावनकुळेंची स्पष्ट भूमिका

बावनकुळे यांनी काँग्रेसवर टीका करताना भाजपची भूमिका स्पष्ट केली. वेगळा विदर्भ हा भाजपचा अजेंडा असून यावर आम्ही काम करत आहोत, असे त्यांनी सांगितले. मुख्यमंत्री देवेंद्र फडणवीस यांनीही कायम वेगळ्या विदर्भाच्या बाजूने भूमिका ठेवली आहे, असे त्यांनी म्हटले.

मनसेचा 'महाराष्ट्राचे तुकडे' होणार नाही, असा इशारा

बावनकुळे यांच्या विधानाचा महाराष्ट्र नवनिर्माण सेनेने (मनसे) तीव्र शब्दांत समाचार घेतला. मनसेने राज ठाकरेंचा एक जुना व्हिडिओ पोस्ट करत आपली भूमिका स्पष्ट केली. "महाराष्ट्र राज्याचे अनेक तुकडे करायचे अशी इच्छा तत्कालीन सत्ताधाऱ्यांची कायमच दिसते. मराठी म्हणून एकत्र येऊ शकणाऱ्या महाराष्ट्राची शकलं का पाडायची आहेत," असा संतप्त सवाल मनसेने उपस्थित केला. मनसे अध्यक्ष राज ठाकरे यांनी कायमच याविरोधात कडक भूमिका घेतली असून, "महाराष्ट्राचे तुकडे पडू देणार नाही हे निश्चित," असे मनसेने ठणकावले आहे.

शिंदे गटाकडूनही विरोध

या वादामुळे महायुतीतच मतभेद असल्याचे स्पष्ट झाले आहे. सत्ताधारी शिवसेनेनेही (शिंदे गट) वेगळ्या विदर्भाच्या मागणीला समर्थन देण्याचा विषय येत नसल्याचे स्पष्ट केले आहे, ज्यामुळे भाजप आणि शिवसेनेमध्ये या मुद्द्यावरून राजकीय अडचणी निर्माण होण्याची शक्यता आहे.

वडेट्टीवारांची सामाजिक न्यायाची भूमिका

या प्रकरणाला सुरुवात करणारे काँग्रेस नेते विजय वडेट्टीवार म्हणाले होते की, विदर्भात दलित, आदिवासी व ओबीसींची संख्या मोठी आहे, त्यामुळे या समाज घटकांना न्याय देण्यासाठी सामाजिक न्यायाच्या भूमिकेतून वेगळे विदर्भ राज्य आवश्यक आहे. या मागणीसाठी दिल्लीत काँग्रेस हायकमांडची भेट घेऊन मोहीम सुरू करण्याचा मानस त्यांनी व्यक्त केला.

हेही वाचा: Raj Thackeray : कष्टकऱ्यांचा विठ्ठल हरपला! - ज्येष्ठ सामाजिक कार्यकर्ते बाबा आढाव यांचे 95 व्या वर्षी निधन