मुख्य मजकुराकडे जा
ब्रेकिंग न्यूज
लातूर जिल्हा बँकेच्या निवडणुकीत भाजपला धक्का; धीरज देशमुखांच्या सहकार पॅनलची बाजीसूर्यकुमार यादवची तुफानी खेळी! १५ चेंडूंत अर्धशतक, २१ चेंडूंत नाबाद ६० धावा; मुंबईचा दणदणीत विजयबसमधील गर्दीचा फायदा घेत ७३ वर्षीय महिलेची सोन्याची बांगडी चोरीलानॉर्थ मेन रस्त्याच्या रुंदीकरणासाठी २१.४ कोटींचे भूसंपादनएमपीएससीच्या नऊ परीक्षांतील गैरव्यवहारांच्या चौकशीसाठी मुदतवाढ; २३ नोव्हेंबरपर्यंत निवेदने सादर करा'जिजाई'वर पार्थ पवारांची आमदारांसोबत खलबते

७५ वर्षीय आजीला इन्स्टाग्राम रील्सचे व्यसन; मोबाइल काढताच घातला गोंधळ, १५ दिवस रुग्णालयात उपचार

मोबाइलच्या अतिवापरामुळे खाण्या-पिण्याचेही भान हरपले; रुग्णालयात उपचार सुरू असताना पाच रुग्णांचे मोबाइल लपविल्याचा प्रकार उघड

स्मिता कुलकर्णी
स्मिता कुलकर्णी

2 मिनिट वाचन

reels
reels

छत्रपती संभाजीनगर : मोबाइलचे व्यसन म्हटले की प्रामुख्याने लहान मुले आणि तरुणांचा विचार केला जातो. मात्र, आता या डिजिटल व्यसनाचा विळखा ज्येष्ठ नागरिकांनाही बसत असल्याचे धक्कादायक उदाहरण छत्रपती संभाजीनगर जिल्ह्यातून समोर आले आहे. जिल्ह्यातील एका ७५ वर्षीय आजीबाईंना इन्स्टाग्रामवरील रील्स पाहण्याचे इतके व्यसन जडले की, त्यांना खाण्या-पिण्याचे तसेच दैनंदिन कामकाजाचेही भान राहिले नाही. मोबाइलपासून दूर केल्यानंतर त्यांची अस्वस्थता वाढत असल्याने अखेर त्यांना रुग्णालयात दाखल करावे लागले. सलग १५ दिवस उपचार घेतल्यानंतर त्यांच्या प्रकृतीत सुधारणा झाली.

रील्स पाहण्याचे रूपांतर व्यसनात

सुरुवातीला मनोरंजनासाठी मोबाइलवर रील्स पाहण्यास सुरुवात केलेल्या आजीबाई हळूहळू त्याच्या आहारी गेल्या. त्या तासन्तास मोबाइलवर रील्स पाहण्यात गुंग राहत असत. मोबाइल हातात असल्यामुळे जेवणाची वेळ झाली किंवा तहान लागली, तरी त्याकडे त्यांचे लक्ष जात नव्हते. कुटुंबीयांनी मोबाइलचा वापर कमी करण्याचा प्रयत्न केला असता त्या अस्वस्थ होत आणि घरात आदळआपट करू लागल्या. त्यामुळे कुटुंबीयांची चिंता वाढली.

रुग्णालयातही पाच मोबाइल लपविले

मोबाइलच्या अतिवापरामुळे आजीबाईंची प्रकृती खालावल्याने त्यांना उपचारासाठी रुग्णालयात दाखल करण्यात आले. मात्र, रुग्णालयात उपचार सुरू असतानाही एक वेगळाच प्रकार घडला. रुग्णालयातील पाच वेगवेगळ्या रुग्णांचे मोबाइल अचानक गायब झाले. यामुळे रुग्णालय प्रशासनाने सीसीटीव्ही फुटेज तपासले. त्यावेळी संबंधित आजीबाईंनीच पाचही मोबाइल उचलून आपल्या पिशवीत लपवून ठेवल्याचे समोर आले. या प्रकारामुळे रुग्णालयातही आश्चर्य व्यक्त करण्यात आले.

अखेर सलग १५ दिवसांच्या उपचारानंतर आजीबाईंच्या प्रकृतीत सुधारणा झाली. मोबाइलचे व्यसन कोणत्याही वयोगटातील व्यक्तीला जडू शकते, हे या घटनेतून पुन्हा एकदा अधोरेखित झाले आहे. मनोरंजनासाठी वापरल्या जाणाऱ्या मोबाइलचा अतिरेक झाल्यास त्याचा शारीरिक आणि मानसिक आरोग्यावर परिणाम होऊ शकतो. त्यामुळे मोबाइल वापरावर नियंत्रण ठेवण्याबरोबरच ज्येष्ठ नागरिकांच्या डिजिटल सवयींकडेही कुटुंबीयांनी लक्ष देणे गरजेचे आहे.

शेअर करा
स्मिता कुलकर्णी

बातमीदार-उपसंपादक

महाराष्ट्र मिरर