PM Modi : बाळासाहेबांच्या जन्मशताब्दीनिमित्त पंतप्रधान मोदींची भावूक पोस्ट! जुन्या आठवणींना दिला उजाळा; म्हणाले, “महाराष्ट्राच्या प्रगतीसाठी बाळासाहेबांचा दृष्टिकोन हीच आमची प्रेरणा”
PM Modi Shared Post On Balasaheb Thackeray : पंतप्रधानांकडून बाळासाहेबांच्या निर्भय पत्रकारितेचा आणि व्यंगचित्रकलेचा गौरव; सोशल मीडियावर बाळासाहेबांसोबतचे ऐतिहासिक फोटो शेअर
नवी दिल्ली | आज 23 जानेवारी 2026 शिवसेनाप्रमुख बाळासाहेब ठाकरे यांच्या जन्मशताब्दीनिमित्त पंतप्रधान नरेंद्र मोदी यांनी त्यांना कृतज्ञतापूर्वक अभिवादन केले आहे. आपल्या सोशल मीडिया पोस्टद्वारे पंतप्रधानांनी बाळासाहेबांच्या व्यक्तिमत्त्वाचे विविध पैलू उलगडले असून, त्यांच्याशी असलेल्या जुन्या मैत्रीच्या आठवणींनाही उजाळा दिला आहे.
पंतप्रधान मोदींच्या पोस्टमधील महत्त्वाचे मुद्दे
अद्वितीय नाते: पंतप्रधान म्हणाले की, बाळासाहेबांचे जनतेशी असलेले नाते हे अद्वितीय होते. त्यांची तीक्ष्ण बुद्धिमत्ता, प्रभावी वक्तृत्व आणि ठाम विचारसरणी यामुळे त्यांनी महाराष्ट्राच्या सामाजिक-राजकीय परिदृश्यावर कायमचा प्रभाव टाकला.
बहुआयामी व्यक्तिमत्त्व
राजकारणापलीकडे बाळासाहेबांना संस्कृती, साहित्य आणि पत्रकारितेची विशेष ओढ होती. एक व्यंगचित्रकार म्हणून त्यांनी समाजाचे जे सूक्ष्म निरीक्षण केले आणि निर्भय भाष्य केले, ते आजही मार्गदर्शक आहे, असे मोदींनी नमूद केले.
विकासाची प्रेरणा: महाराष्ट्राच्या प्रगतीसाठी बाळासाहेबांनी जे स्वप्न पाहिले होते, त्यातूनच आम्हाला महाराष्ट्राच्या विकासाची मोठी प्रेरणा मिळते आणि ती साकार करण्यासाठी आम्ही सदैव कटिबद्ध आहोत, असा शब्दही पंतप्रधानांनी दिला.
ऐतिहासिक फोटोंची चर्चा पंतप्रधान मोदींनी या पोस्टसोबत बाळासाहेबांसोबतचे काही दुर्मिळ फोटो शेअर केले आहेत. यामध्ये नरेंद्र मोदी जेव्हा गुजरातचे मुख्यमंत्री होते, तेव्हा त्यांनी घेतलेल्या बाळासाहेबांच्या भेटींचे फोटो आहेत. एका फोटोत दोन्ही नेते राजकीय सभेच्या व्यासपीठावर चर्चा करताना दिसत आहेत. हे फोटो सध्या सोशल मीडियावर प्रचंड व्हायरल होत असून, ‘दोन महानेत्यांमधील मैत्री’ अशा कमेंट्स नेटकऱ्यांकडून येत आहेत.
