Pune News : पुण्यातील टोळीयुद्धाचा थरार! 'आंदेकर टोळी'ने घेतला बदला, मुलावर गोळ्या झाडून हत्या
•18 वर्षीय आयुष कोमकरच्या शरीरात नऊ गोळ्या, टोळीयुद्ध पुन्हा ऐरणीवर; आई-वडिलांना मुलाच्या अंत्यसंस्कारासाठी नागपूर कारागृहातून पुण्यात आणणार
1 मिनिट वाचन
•18 वर्षीय आयुष कोमकरच्या शरीरात नऊ गोळ्या, टोळीयुद्ध पुन्हा ऐरणीवर; आई-वडिलांना मुलाच्या अंत्यसंस्कारासाठी नागपूर कारागृहातून पुण्यात आणणार
पुणे :- पुण्यातील टोळीयुद्धाने पुन्हा एकदा डोके वर काढले असून, शहराला हादरवून टाकणारी एक धक्कादायक घटना समोर आली आहे. माजी नगरसेवक वनराज आंदेकर यांच्या हत्येचा बदला घेण्यासाठी गणेश कोमकर याच्या 18 वर्षीय मुलाची, आयुष कोमकरची भरदिवसा गोळ्या झाडून निर्घृण हत्या करण्यात आली आहे.
सोमवारी दुपारी चार वाजता वैकुंठ स्मशानभूमीत आयुषवर अंत्यसंस्कार होणार आहेत. या घटनेमुळे संपूर्ण शहरात खळबळ उडाली आहे. आयुषचे आई-वडील, गणेश आणि कल्याणी कोमकर, हे वनराज आंदेकर यांच्या हत्या प्रकरणात आरोपी असून ते सध्या नागपूर कारागृहात बंद आहेत. त्यांच्या मुलाच्या अंत्यविधीसाठी त्यांना खास परवानगीने पुण्यात आणले जाणार आहे. टोळीयुद्धाचा धोका लक्षात घेता अंत्यसंस्काराच्या ठिकाणी मोठा पोलीस बंदोबस्त ठेवण्यात आला आहे.
ही घटना 5 सप्टेंबर रोजी घडली. कॉलेजमधून परत आल्यानंतर आयुष कोमकर आपल्या इमारतीच्या पार्किंगमध्ये गाडी पार्क करत असताना मारेकऱ्यांनी त्याच्यावर गोळ्या झाडल्या. यश पाटील आणि अमित पाटोळे अशी अटक करण्यात आलेल्या दोन मारेकऱ्यांची नावे आहेत. यश पाटीलने आयुषवर गोळ्या झाडल्याचा आरोप आहे. आयुषच्या शरीरात तब्बल नऊ गोळ्या शिरल्या. त्याला तातडीने रुग्णालयात दाखल करण्यात आले, परंतु त्याचा उपचारापूर्वीच मृत्यू झाला.
गोळीबार करताना मारेकरी 'इथे फक्त बंडू आंदेकर व कृष्णा आंदेकरच' असे ओरडत होते. या हत्येप्रकरणी बंडू आंदेकर, त्याचा मुलगा कृष्णा आंदेकर यांच्यासह 13 जणांविरुद्ध गुन्हा दाखल करण्यात आला आहे. मात्र, घटनेनंतर आंदेकर टोळीचा प्रमुख बंडू आंदेकर आणि त्याचे साथीदार फरार झाले असून पोलीस त्यांचा शोध घेत आहेत. या घटनेने पुण्यातील कायदा-सुव्यवस्थेचा प्रश्न पुन्हा ऐरणीवर आला आहे.
