Pune News : पुणे MPSC आंदोलनावरून महाविकास आघाडीत ठिणगी; सुषमा अंधारेंच्या 'युद्ध जिंकलो, तहात हरलो' विधानावर रोहित पवारांचे खडे बोल!

Pune News :पुणे :- पुण्यात गाजलेले MPSC विद्यार्थ्यांचे आंदोलन शिवेंद्रराजेंच्या मध्यस्थीनंतर आणि विवेक भीमनवार यांना सक्तीच्या रजेवर पाठवल्यानंतर स्थगित करण्यात आले. या घडामोडीनंतर शिवसेना (उद्धव बाळासाहेब ठाकरे) पक्षाच्या नेत्या सुषमा अंधारे यांनी, "आपण युद्धात जिंकलो आणि तहात हरलो," असे म्हणत तीव्र नाराजी व्यक्त केली होती. अंधारेंच्या या टीकेमुळे संतप्त झालेले राष्ट्रवादी काँग्रेस (शरद पवार गट) पक्षाचे आमदार रोहित पवार यांनी पत्रकार परिषद घेत त्यांना अत्यंत सडेतोड आणि कडक शब्दांत प्रत्युत्तर दिले आहे.https://maharashtramirror.com/ Pune News

राष्ट्रवादी काँग्रेस (शरद पवार गट) पक्षाचे आमदार रोहित पवार हे तब्बल 11 दिवस MPSC विद्यार्थ्यांसह एस.एम. जोशी पुलाजवळ थंडी-वारा सहन करत ठाण मांडून बसले होते आणि रात्रीही तिथेच झोपत होते. मात्र, मते आणि मुख्य मागणी असलेल्या अधिकाऱ्याच्या राजीनाम्याशिवाय आंदोलन मागे घेतल्यामुळे सुषमा अंधारे यांनी यावर जाहीर टीका केली होती. या आंदोलनातून हातात काहीच पडले नाही, अशी टिप्पणी त्यांनी केल्यामुळे राजकीय वर्तुळात मोठी चर्चा रंगली होती.

सुषमा अंधारेंच्या टीकेला उत्तर देताना रोहित पवार म्हणाले की, केवळ व्यासपीठावर येऊन आक्रमक भाषणे देऊन निघून जाणे सोपे असते. जर खऱ्या अर्थाने विद्यार्थ्यांचा कळवळा असता, तर तिथे जाऊन रात्रभर थांबायला आणि झोपायला पाहिजे होते.

त्या प्रसंगाची तीव्रता सांगताना ते पुढे म्हणाले की, "तिथे पोलिसांचा प्रचंड दबाव होता, 15 जणांवर आधीच कारवाई झाली होती आणि दुसऱ्या दिवशी आणखी 800 ते 1200 विद्यार्थ्यांवर कठोर कारवाई होण्याची शक्यता होती. जर आम्ही जिद्दीनं तसेच बसून राहिलो असतो, तर पोलिसांच्या गाड्यांमध्ये बसून फोटो काढता आले असते आणि हिरो बनून राजकीय पोळ्या भालता आल्या असत्या. पण यामुळे निष्पाप विद्यार्थ्यांच्या भवितव्याचे मोठे नुकसान झाले असते, जे आम्हाला अजिबात मान्य नव्हते," असे स्पष्ट करत रोहित पवारांनी आपल्या भूमिकेचा बचाव केला आहे.