Prashant Jagtap : प्रशांत जगतापांचा 'हात' भक्कम! "राजकारण सोडेन पण काँग्रेस सोडणार नाही"; पक्षप्रवेशावेळी भावनिक आवाहन

•भाजप आणि संघ विचारधारेविरोधात लढण्यासाठी काँग्रेसची निवड; ठाणे-शिंदे गटाच्या ऑफर नाकारल्या

मुंबई | पुणे महानगरपालिका निवडणुकीच्या तोंडावर राष्ट्रवादी काँग्रेसला (SP) मोठा धक्का देत, माजी महापौर प्रशांत जगताप यांनी आज काँग्रेसमध्ये प्रवेश केला. काँग्रेस प्रदेशाध्यक्ष हर्षवर्धन सपकाळ आणि विधानसभा विरोधी पक्षनेते विजय वडेट्टीवार यांच्या उपस्थितीत हा सोहळा पार पडला. यावेळी जगताप यांचे स्वागत गोविंद पानसरे लिखित 'शिवाजी कोण होता?' हे पुस्तक देऊन करण्यात आले.

काँग्रेस प्रवेशाचे मुख्य कारण

अजित पवार यांच्या राष्ट्रवादीसोबत महापालिका निवडणुकीत युती करण्याच्या हालचाली शरद पवार गटात सुरू होत्या. "ज्यांनी भाजपला साथ दिली, त्यांच्यासोबत मी जाऊ शकत नाही," अशी ठाम भूमिका घेत जगताप यांनी राजीनामा दिला होता. त्यांना शिवसेना (UBT) आणि शिवसेना (शिंदे गट) या दोन्ही पक्षांकडून ऑफर्स होत्या, मात्र त्यांनी पुरोगामी विचारांशी बांधील राहण्यासाठी काँग्रेसची निवड केली.

प्रशांत जगताप यांच्या भाषणातील महत्त्वाचे मुद्दे

"गांधी, नेहरू आणि शिव-शाहू-आंबेडकर यांचे विचार पुढे नेण्यासाठी मी काँग्रेसमध्ये आलो आहे. माझी लढाई भाजप, संघ आणि दहशतवादी वृत्तीच्या विरोधात आहे." "पुणे सध्या गुन्हेगारी आणि भ्रष्टाचारात पहिल्या क्रमांकावर आहे, हे खुद्द गृहमंत्री सांगतात. भाजपच्या ताब्यात असलेल्या पुण्याची अवस्था दयनीय झाली आहे. "राष्ट्रवादीमध्ये असताना माझ्यावर 16 गुन्हे दाखल झाले, कारण मी सर्वाधिक आंदोलने केली. आता काँग्रेस जो निर्णय घेईल, त्याच्याशी मी एकरूप राहीन. राजकारण बंद करेन, पण आता काँग्रेस सोडून कुठेही जाणार नाही."
पवार साहेबांबद्दल आदर: "मी पवार साहेबांच्या विचाराने प्रेरित होऊन तरुण वयात राजकारणात आलो होतो. कोणाबद्दलही मनात वैर नाही, पण तत्वज्ञानासाठी हा निर्णय घेतला आहे."

पुणे महापालिकेवर काय परिणाम होणार?

प्रशांत जगताप हे पुण्याच्या राजकारणातील आक्रमक चेहरा मानले जातात. त्यांच्या काँग्रेस प्रवेशामुळे पुण्यातील काँग्रेसची संघटनात्मक ताकत वाढण्याची शक्यता आहे. विशेषतः दोन्ही राष्ट्रवादी एकत्र लढणार असल्याने नाराज झालेला मूळ राष्ट्रवादीचा कार्यकर्ता जगतापांच्या मागे उभा राहू शकतो, ज्यामुळे आगामी निवडणुकीत चौरंगी किंवा पंचरंगी लढत पाहायला मिळू शकते.

हेही वाचा: अग्रलेख : ‘मौन’ ऋषीची कर्तृत्वगाथा