Holi 2026 : होळीवर चंद्रग्रहणाचे सावट, पण उत्सवाचा आनंद कायम! जाणून घ्या मार्चचा 'वेधकाळ' आणि 3 अन्नाच्या शुद्धतेसाठी पाळायचे नियम

Holi 2026 Latest News : मंगळवारी सकाळी 11 पासून वेधकाळ; धूलिवंदन खेळण्यास अडथळा नाही | गर्भवती आणि वृद्धांसाठी विशेष सूचना | तुळशीपत्राचा वापर करून अशी जपा अन्नाची शुद्धता

मुंबई :- यंदा होळी आणि चंद्रग्रहण एकाच वेळी आल्यामुळे अनेक भाविकांच्या मनात संभ्रम आहे. मात्र, दाते पंचांग आणि ज्योतिषाचार्य श्रीकेतन कुलकर्णी यांनी दिलेल्या माहितीनुसार, शास्त्र पाळूनही आपल्याला धूलिवंदन आणि होळीचा उत्साह साजरा करता येणार आहे. 2 मार्च रोजी होलिका दहन होईल, तर 3 मार्च रोजी पौर्णिमेसोबतच 'ग्रस्तोदित चंद्रग्रहण' लागणार आहे. Holi 2026 Latest News

महत्त्वाच्या तारखा आणि वेळा

2 मार्च 2026 : होलिका दहन (नेहमीप्रमाणे पार पडेल).

3 मार्च 2026 : चंद्रग्रहण आणि धूलिवंदन.

वेधकाळ: मंगळवारी (3 मार्च) सूर्योदयापासूनच वेधकाळ सुरू होईल.

सवलत: लहान मुले, वृद्ध, आजारी व्यक्ती आणि गर्भवती स्त्रियांनी सकाळी 11 वाजेपासून वेध पाळले तरी चालतील.

वेधकाळात काय करावे आणि काय टाळावे?

वेधकाळात पूजन निषिद्ध नाही, पण भोजन निषिद्ध आहे. याचा अर्थ तुम्ही देवाची पूजा, अभिषेक आणि कुळधर्म करू शकता. अभिषेकाचे तीर्थ किंवा नैवेद्याचा एखादा घास घेण्यास हरकत नाही. मात्र, पूर्ण जेवण टाळावे. गुरुजी किंवा सुवासिनींना कोरडा शिधा आणि दक्षिणा देऊन कुळधर्म उरकता येईल.

धूलिवंदन आणि ग्रहण स्नान

3 मार्चला वेधकाळातही धूलिवंदन आणि रंग खेळता येईल. मात्र, सायंकाळी सूर्यास्तापासून ते 6.48 वाजेपर्यंत ग्रहणाचा पर्वकाळ असेल. या काळात जपावर लक्ष केंद्रित करावे. 6.48 नंतर 'मोक्षस्नान' (ग्रहणा नंतरचे स्नान) करून घर शुद्ध करावे आणि त्यानंतरच भोजन ग्रहण करावे.

अन्न शुद्धतेसाठी तुळशीपत्राचा असा करा वापर

ग्रहण काळात वातावरणातील नकारात्मकतेचा परिणाम अन्नावर होऊ नये, म्हणून शास्त्रात तुळशीपत्राचा वापर सांगितला आहे:

शिजवलेले अन्न: भात, आमटी, भाजी, दूध आणि दह्यावर एक तुळशीपत्र ठेवावे.

पाणी: पिण्याचे पाणी, माठ किंवा तांब्याच्या भांड्यात एक पान टाकावे.

देवघर: देवमूर्तींसमोर ठेवलेल्या नैवेद्यावरही तुळशीपत्र ठेवावे. यामुळे अन्न आणि पाणी शुद्ध राहते असे मानले जाते.

गर्भवती महिलांसाठी विशेष टीप
गर्भवती महिलांनी वेधकाळात (सकाळी 11 नंतर) शक्यतो विश्रांती घ्यावी आणि देवाची आराधना करावी. धारदार वस्तूंचा वापर टाळणे आणि ग्रहण काळात बाहेर न पडणे हिताचे मानले जाते.