Pune News : महापालिकेच्या कार्यालयातच मिळेना पाणी!;प्रशासनावरच आलीय बाटलीबंद पाणी विकत घेण्याची वेळ

Pune News :पुणे, महाराष्ट्र मिरर : संपूर्ण परिसराच्या मूलभूत सुविधांची काळजी वाहण्याची जबाबदारी असलेल्या महापालिका कार्यालयात गेले १५ दिवस पिण्याचे पाणीच उपलब्ध नसल्याची धक्कादायक बाब समोर आली आहे. एका बाजूला हडपसर आणि मांजरी भागातील नागरिक अशुद्ध अन् अनियमित पाणीपुरवठ्याने हैराण झाले असताना, दुसरीकडे स्वतः प्रशासकीय कार्यालयावरच पाणी विकत घेण्याची वेळ आल्याने पालिकेच्या ढिसाळ नियोजनावर नागरिकांमधून तीव्र संताप व्यक्त होत आहे.https://maharashtramirror.com/ Pune News

हडपसर-मांजरी क्षेत्रीय कार्यालयाच्या हद्दीत येणाऱ्या ससाणेनगर, हडपसर गाव, काळे-बोराटे नगर, सातवडी, गोंधळेनगर आणि लगतच्या विविध उपनगरांमध्ये गेल्या अनेक दिवसांपासून पाणीप्रश्न अत्यंत गंभीर बनला आहे. नळांना नियमित आणि वेळेवर पाणी न येणे, पाणी आल्यास अत्यंत कमी दाबाने येणे आणि अनेकदा गढूळ किंवा दूषित पाण्याचा पुरवठा होणे, अशा तक्रारींचा पाढा नागरिकांनी वाचला आहे. पिण्याच्या आणि दैनंदिन वापराच्या पाण्यासाठी नागरिकांना नाहक कसरत करावी लागत असून, पालिकेकडून यावर कोणतीही कायमस्वरूपी उपाययोजना केली जात नसल्याचा आरोप स्थानिक रहिवासी करत आहेत.

हडपसर-मांजरी क्षेत्रीय कार्यालयात नागरिकांची रोज मोठी वर्दळ असते. या इमारतीत कर विभाग, अतिक्रमण, जन्म-मृत्यू नोंदणी, वृक्ष छाटणी व उद्यान, पथ विभाग, चेंबर व ड्रेनेज, घनकचरा व्यवस्थापन, कीटकनाशक आणि मालमत्ता विभाग असे अनेक महत्त्वपूर्ण विभाग कार्यरत आहेत. त्यातच याच आवारात आधार केंद्र असल्याने विविध दाखले, नोंदणी आणि दुरुस्तीच्या कामासाठी दररोज शेकडो नागरिक येथे येतात.
यामध्ये महिला, लहान मुले, नवजात बालकांना सोबत घेऊन येणाऱ्या माता, वयोवृद्ध नागरिक आणि कामगार वर्गाचा मोठ्या प्रमाणावर समावेश असतो. मात्र, गेल्या पंधरा दिवसांपासून या कार्यालयातील पिण्याच्या पाण्याचे रांजण सुके ठाक पडले आहेत. या कडक उन्हात किंवा त्रासात कामानिमित्त तासन तास ताटकळत उभ्या राहणाऱ्या नागरिकांना पाण्यासाठी वणवण भटकावे लागत आहे. नागरिक आणि कर्मचाऱ्यांना तहान भागवण्यासाठी रोज स्वतःच्या खिशातून पैसे खर्च करून बाटलीबंद पाणी विकत घ्यावे लागत आहे.

प्रशासनाची ही उदासीनता एवढ्यावरच थांबलेली नाही, तर अधिकाऱ्यांच्या जबाबदारी झटकण्याच्या वृत्तीमुळे नागरिकांचा रोष अधिकच अनावर झाला आहे. या प्रशासकीय गोंधळाबाबत प्रशासकीय अधिकारी महेश खंदारे यांच्याशी प्रत्यक्ष भेट घेऊन विचारणा केली असता, त्यांनी दिलेले उत्तर थक्क करणारे होते.
“माझ्याकडे केवळ क्षेत्रीय कार्यालयाच्या तिसऱ्या मजल्यावरील प्रशासकीय कामकाजाची जबाबदारी आहे. तळमजला, पहिला मजला आणि दुसऱ्या मजल्यावरील समस्या किंवा सोयी-सुविधांशी माझा थेट संबंध नाही,” असे सांगत खंदारे यांनी आपली जबाबदारी झटकली.

अधिकाऱ्याच्या या बेजबाबदार वक्तव्यानंतर ‘महापालिकेत नक्की चाललंय काय?’ असा सवाल नागरिक विचारत आहेत. जर एकाच इमारतीमधील पहिल्या व दुसऱ्या मजल्याच्या समस्यांची जबाबदारी स्वीकारायला अधिकारी तयार नसतील, तर संपूर्ण हडपसर-मांजरी परिसरातील लाखो नागरिकांच्या पाणीसमस्येचे निवारण कोण करणार, असा थेट प्रश्न आता उपस्थित केला जात आहे.

तातडीने उपाययोजना करण्याची त्रस्त नागरिकांची मागणी
ज्या महापालिका प्रशासनावर नागरिकांना स्वच्छ व पुरेसे पाणी पुरवण्याची घटनात्मक जबाबदारी आहे, तेच प्रशासन स्वतःच्या कार्यालयात साधे पिण्याचे पाणी ठेवू शकत नसेल, तर यापेक्षा मोठा दैवदुर्विलाक कोणता असणार? नागरिक कर भरूनही त्यांना मूलभूत हक्कांसाठी संघर्ष करावा लागत आहे.
हडपसर-मांजरी परिसरातील अशुद्ध आणि अनियमित पाणीपुरवठा तातडीने सुलभ करून या समस्येवर कायमस्वरूपी तोडगा काढावा. तसेच, क्षेत्रीय कार्यालयातील पिण्याच्या पाण्याची बंद पडलेली व्यवस्था २४ तासांच्या आत पूर्ववत करावी, अशी जोरदार मागणी स्थानिक नागरिक व विविध सामाजिक संघटनांकडून केली जात आहे. आता तरी पालिका प्रशासन झोपेतून जागे होऊन यावर ठोस कारवाई करणार का, याकडे सर्वांचे लक्ष लागले आहे.