Thackeray Vijay Melava : मराठीच्या मंचावर ठाकरे एकत्र? विजयी मेळाव्याची राजकीय चर्चा तेजीत!

Thackeray Brother Vijay Melava : विजयी मेळाव्याच्या पोस्टरवर राज ठाकरे; ठाकरे ब्रँड पुन्हा एकदा झळकणार

मुंबई | मुंबईमध्ये मराठी अस्मितेच्या मुद्यावरून आयोजित विजयी मेळाव्यामुळे महाराष्ट्राच्या राजकारणात नव्या समीकरणांची चर्चा सुरू झाली आहे. Thackeray Brother Vijay Melava उद्धव ठाकरे यांच्या पक्षाच्या वतीने अधिकृत अकाउंटवर राज ठाकरे यांचा फोटो असलेले पोस्टर प्रसिद्ध झाल्याने, आगामी स्थानिक स्वराज्य संस्था निवडणुकांच्या पार्श्वभूमीवर ठाकरे बंधू पुन्हा एकत्र येतील का, याकडे सर्वांचे लक्ष लागले आहे.

या मेळाव्याला कोणत्याही पक्षाचा मेळावा म्हणता येणार नाही. व्यासपीठावर कोणताही पक्षाचा झेंडा, चिन्ह नसेल, केवळ मराठी भाषेसाठी एकत्र आलेले नेतृत्व असेच चित्र असेल, असे आयोजकांनी स्पष्ट केले आहे. मात्र, या माध्यमातून पुन्हा एकदा ठाकरे ब्रँडची झलक दाखवण्याचा प्रयत्न असल्याचे सांगितले जात आहे.

शिवसेना (उद्धव बाळासाहेब ठाकरे) पक्षाचे खासदार संजय राऊत यांनीही स्पष्ट केलं की, “या मेळाव्याचे मुख्य आकर्षण म्हणजे राज ठाकरे आणि उद्धव ठाकरे हेच असतील. व्यासपीठावर फक्त प्रमुख नेतेच असतील. कोणताही राजकीय ढोलबाजा न करता, मराठीसाठी एकत्र येण्याचा हा प्रयत्न आहे.”

राज ठाकरे यांची व्यासपीठावर उपस्थिती ही राजकीयदृष्ट्या महत्त्वपूर्ण मानली जात आहे. शिवसेनेच्या उद्धव गटासोबत राज ठाकरे यांची युती झाल्यास मुंबई आणि ठाणे महानगरपालिका निवडणुकांत भाजपला तगडं आव्हान मिळू शकते. त्यामुळे या एका ‘अपक्ष’ मेळाव्यातून निर्माण होणाऱ्या राजकीय संदेशाकडे सगळ्यांचे लक्ष लागले आहे.