Tesla In Mumbai : महाराष्ट्रात टेस्लाचा भव्य प्रवेश! मुंबईत उघडले पहिले शोरूम

•इलेक्ट्रिक वाहन क्षेत्रात महाराष्ट्र अग्रगण्य असल्याचा मुख्यमंत्र्यांचा विश्वास

मुंबई | इलेक्ट्रिक वाहन निर्मितीत जागतिक ख्याती असलेल्या टेस्ला कंपनीने अखेर भारतीय बाजारात अधिकृतपणे प्रवेश केला असून, तिचे पहिले शोरूम मुंबईतील बांद्रा-कुर्ला कॉम्प्लेक्स (BKC) येथील मेकर मॅक्सिटी मॉलमध्ये सुरू करण्यात आले आहे. यानिमित्ताने भारतात टेस्लाच्या प्रत्यक्ष अस्तित्वाचा नवा अध्याय सुरू झाला आहे.

या ऐतिहासिक प्रसंगी महाराष्ट्राचे उपमुख्यमंत्री देवेंद्र फडणवीस यांनी आनंद व्यक्त करत म्हटलं, "आजचा दिवस अत्यंत महत्त्वाचा आहे. टेस्लाने भारतात प्रवेश करताना मुंबई व महाराष्ट्राची निवड केल्याने अभिमान वाटतो." ते पुढे म्हणाले की, "टेस्ला एक्स्पीरियन्स सेंटर, डिलिव्हरी नेटवर्क, लॉजिस्टिक्स आणि सर्व्हिसिंगची संपूर्ण यंत्रणा महाराष्ट्रात सुरू होत आहे. हे राज्य लवकरच EV क्षेत्रात देशाचे नेतृत्व करणार आहे."

गेल्या आठवड्यात टेस्लाने त्यांच्या भारत-केंद्रित X (माजी ट्विटर) हँडलवर "Coming Soon" अशी पोस्ट शेअर करून संकेत दिला होता. आता जुलै २०२५ मध्ये प्रत्यक्षात शोरूम सुरू करत त्यांनी त्या घोषणेला मूर्त स्वरूप दिलं आहे.

Model Y ही टेस्लाची लोकप्रिय कार भारतात उपलब्ध होणार असून तिच्या किंमतीही उघड करण्यात आल्या आहेत. रियर-व्हील ड्राईव्ह प्रकाराची किंमत 59.89 लाख रुपये, तर लाँग रेंज व्हर्जनची किंमत 67.89 लाख रुपये इतकी आहे. ऑन-रोड किंमत सुमारे 61 लाखांपासून सुरू होत आहे.

या घोषणेनंतर आता भारतातील ग्राहकांसाठी टेस्ला गाड्या खरेदी करणे अधिक सुलभ होणार आहे. यामुळे भारतातील प्रीमियम इलेक्ट्रिक वाहन बाजारात स्पर्धा अधिकच तीव्र होणार असून, महाराष्ट्र हे केंद्रबिंदू ठरणार आहे.

हेही वाचा: Cricket Live Update : लॉर्ड्सवर पराभव आणि WTCमध्ये घसरण – टीम इंडियाला दुहेरी धक्का!