Sanjay Raut : "परराष्ट्र धोरण माती खातंय!" इराणच्या नेत्याच्या मृत्यूनंतर मोदी सरकार गप्प का? संजय राऊतांचा केंद्र सरकारवर बोचरा वार

•राज्यसभेच्या 'सातव्या' जागेसाठी महाविकास आघाडीची वज्रमूठ; 'एपस्टीन फाईल्स' लपवण्यासाठीच अमेरिकेने युद्धाचा बार उडवल्याचा खळबळजनक दावा

मुंबई :- मध्यपूर्वेतील रणधुमाळी आणि देशांतर्गत राज्यसभेच्या निवडणुका या दोन्ही आघाड्यांवर सध्या राजकीय वातावरण तापले असून, शिवसेना नेते खासदार संजय राऊत यांनी केंद्र सरकारवर टीकेची झोड उठवली आहे. इराणचे सर्वोच्च नेते अयातुल्ला अली खामेनेई यांच्या मृत्यूनंतर भारताने पाळलेल्या मौनावरून राऊतांनी संताप व्यक्त करत, "आपले परराष्ट्र धोरण माती खात आहे," अशा तिखट शब्दांत सरकारचा निषेध केला आहे. आंतरराष्ट्रीय शिष्टाचाराचा विसर पडल्याने भारताची प्रतिमा मलिन होत असल्याचा आरोप त्यांनी आज मुंबईत माध्यमांशी बोलताना केला.

संजय राऊत यांच्या मते, इराण हा भारताचा पारंपरिक मित्र देश असून अशा कठीण प्रसंगी त्या देशाच्या नेत्याबद्दल शोक संवेदना व्यक्त करणे हे राजनैतिक कर्तव्य होते. पंतप्रधान नरेंद्र मोदी हे जॉर्डन, सौदी अरेबिया आणि कुवेतच्या प्रमुखांशी संवाद साधतात, मात्र इराणवर आलेल्या संकटाबाबत ते गप्प का आहेत, असा सवाल त्यांनी उपस्थित केला. "शत्रू राष्ट्र असलेल्या पाकिस्तानच्या राष्ट्रप्रमुखांच्या मृत्यूनंतरही भारताने यापूर्वी दुःख व्यक्त केले होते, हा आपला वारसा आहे. पण आताच्या परराष्ट्र धोरणात माणुसकी आणि शिष्टाचाराला स्थान उरलेले नाही," असे म्हणत त्यांनी केंद्र सरकारला धारेवर धरले.

केवळ परराष्ट्र धोरणच नव्हे, तर इराण-अमेरिका युद्धामागे एक 'डार्क' गुपित असल्याचा दावाही राऊत यांनी यावेळी केला. अमेरिकेत गाजत असलेल्या 'एपस्टीन फाईल्स'मधून जगातील अनेक बड्या नेत्यांची नावे बाहेर येण्याची भीती असल्याने, जगाचे लक्ष भरकटवण्यासाठीच हे युद्ध मुद्दाम लादले गेल्याचे त्यांनी सांगितले. पृथ्वीराज चव्हाण यांनी यापूर्वीच अशा फाईल्समुळे सरकार अडचणीत येईल, असा इशारा दिला होता, याची आठवण करून देत राऊत यांनी या युद्धामागील जागतिक षडयंत्रावर प्रकाश टाकला.

दरम्यान, महाराष्ट्रातील राज्यसभेच्या सातव्या जागेबाबतही त्यांनी महाविकास आघाडीचा आत्मविश्वास बोलून दाखवला. "शिवसेना, काँग्रेस आणि शरद पवार यांची राष्ट्रवादी एकत्र असून आम्ही ही जागा एकमताने जिंकू. कोणत्याही एका पक्षाचा हा वैयक्तिक निर्णय नसून, तिन्ही पक्ष मिळून आज संध्याकाळपर्यंत महाविकास आघाडीचा अधिकृत उमेदवार जाहीर करतील," असे स्पष्ट करत त्यांनी निवडणुकीच्या मैदानात भाजपला कडवे आव्हान देण्याचे संकेत दिले. या विधानांमुळे आता राज्याच्या राजकारणात आणि केंद्र सरकारच्या वर्तुळात काय पडसाद उमटतात, याकडे सर्वांचे लक्ष लागले आहे.

हेही वाचा: Rohit Pawar : अजित पवार अपघात की घातपात? रोहित पवारांचा 'रेकी'चा खळबळजनक दावा; 'ॲरो' ग्रुपमधील बड्या अधिकाऱ्यांवर गुन्हा दाखल करण्याची मागणी