Pune Crime : केडगावात बंद घर फोडून पावणेदोन लाखांची चोरी

Pune Crime पुणे, महाराष्ट्र मिरर : पुणे ग्रामीण पोलीस दलाच्या हद्दीत घरफोडीच्या घटनांचे सत्र सुरूच असून, दौंड तालुक्यातील केडगाव परिसरात घरफोडीची एक मोठी घटना उघडकीस आली आहे. केडगाव येथील देशमुखमळा, शेलार मोरेवस्ती येथे राहणाऱ्या एका मजुराचे बंद घर चोरट्यांनी लक्ष्य करत कपाटातील सोन्याचे दागिने आणि रोकड असा एकूण १ लाख ९४ हजार रुपयांचा ऐवज लांबवला आहे.या प्रकरणी प्रफुल्ल बाळासाहेब कदम (वय २९, रा. शेलार मोरेवस्ती, केडगाव, ता. दौंड) यांनी यवत पोलीस ठाण्यात फिर्याद दिली असून, या फिर्यादीवरून अज्ञात चोरट्यांविरुद्ध भारतीय न्याय संहिता २०२३ चे कलम ३०५ व ३३१(३) अन्वये घरफोडी आणि चोरीचा गुन्हा दाखल करण्यात आला आहे.https://maharashtramirror.com/ Pune crime

पोलिसांनी दिलेल्या माहितीनुसार, फिर्यादी हे रविवारी (२९ ऑगस्ट) सकाळी ९:३० ते दुपारी १२:३० या वेळेत कामानिमित्त घराला कुलूप लावून बाहेर गेले होते. या अल्प कालावधीत अज्ञात चोरट्याने त्यांच्या बंद घराच्या दरवाजाचे कुलूप कशाच्या तरी साहाय्याने तोडून आत प्रवेश केला आणि कपाटात व बरणीत ठेवलेले सोन्याचे दागिने व रोकड लंपास केली. चोरीला गेलेल्या मुद्देमालामध्ये ७५ हजार रुपये किमतीचे १ सव्वा तोळे वजनाचे सोन्याचे मणी गंठण, ५४ हजार रुपये किमतीचे ९ ग्रॅम वजनाचे कानातील सोन्याचे झुबे व वेल, ६० हजार रुपये किमतीच्या १ तोळे वजनाच्या सोन्याच्या दोन अंगठ्या आणि ५ हजार रुपयांची रोख रक्कम असा एकूण १,९४,००० रुपयांचा मुद्देमाल समाविष्ट आहे. फिर्यादी हे दुपारी घरी परतल्यानंतर त्यांना घरात चोरी झाल्याचे निदर्शनास आले. यानंतर त्यांनी तातडीने यवत पोलीस ठाण्यात धाव घेऊन तक्रार नोंदवली.या प्रकरणाचा पुढील तपास यवत पोलीस ठाण्याचे पोलीस हवालदार जगताप करत आहेत.https://maharashtramirror.com/ Pune crime

ऐन दिवसाढवळ्या घडलेल्या या घरफोडीच्या घटनेमुळे केडगाव आणि परिसरातील नागरिकांमध्ये भीतीचे वातावरण पसरले असून, पोलिसांनी रात्रीच्या व दिवसाच्या गस्तीत वाढ करावी, अशी मागणी स्थानिक रहिवाशांकडून केली जात आहे.