Palghar News : पालघरमध्ये मालगाडीच्या धडकेत तीन तरुणांचा दुर्दैवी मृत्यू; पोलिसांच्या मारहाणीमुळे अपघात झाल्याचा नातेवाईकांचा खळबळजनक आरोप

Palghar Latest News : वीरेंद्र नगरमधील स्वप्निल, कुणाल आणि अफरोज यांचा जागीच अंत; जुन्या पालघरमधील जैन मंदिराजवळ घडली हृदयद्रावक घटना

पालघर :- पालघर शहरात काळजाचा थरकाप उडवणारी एक घटना घडली आहे. पालघर पूर्वेतील जुना पालघर परिसरात जैन मंदिराजवळ मालगाडीच्या धडकेत तीन तरुणांचा जागीच मृत्यू झाला आहे. मात्र, हा केवळ अपघात नसून पोलिसांच्या भीतीपोटी ही घटना घडल्याचा गंभीर आरोप मृतांच्या नातेवाईकांनी केल्याने परिसरात प्रचंड संताप व्यक्त केला जात आहे.

नेमकी घटना काय?

मिळालेल्या माहितीनुसार, पालघर पूर्वेतील वीरेंद्र नगर परिसरात राहणारे स्वप्निल शैलेश पालांडे (23 वय), कुणाल कुमार दुबळा (23 वय) आणि अफरोज खलील शेख (28 वय) हे तीन तरुण रेल्वे रुळांजवळ असताना मालगाडीने त्यांना धडक दिली. ही धडक इतकी भीषण होती की तिघांचाही जागीच मृत्यू झाला. घटनेची माहिती मिळताच लोहमार्ग पोलीस (GRP) घटनास्थळी दाखल झाले असून त्यांनी मृतदेह ताब्यात घेऊन शवविच्छेदनासाठी पाठवले आहेत.

नातेवाईकांचे पोलिसांवर गंभीर आरोप

या अपघातानंतर मृतांच्या नातेवाईकांनी स्थानिक पोलिसांच्या भूमिकेवर प्रश्नचिन्ह उपस्थित केले आहे. नातेवाईकांच्या दाव्यानुसार:

अपघाताच्या काही वेळ आधी काही पोलीस कर्मचारी त्या ठिकाणी आले होते.

पोलिसांनी या तरुणांना मारहाण केली, ज्यामुळे तरुण घाबरले.

पोलिसांच्या भीतीपोटी जीव वाचवण्यासाठी पळत असताना, रेल्वे रुळ ओलांडण्याच्या प्रयत्नात समोरून येणाऱ्या मालगाडीचा त्यांना अंदाज आला नाही आणि हा अपघात घडला.

या आरोपामुळे वीरेंद्र नगर आणि पालघर पूर्वेतील नागरिकांमध्ये संतापाची लाट उसळली आहे.

तपास सुरू

घटनेनंतर परिसरात खळबळ उडाली असून गावकऱ्यांनी आणि नातेवाईकांनी घटनास्थळी मोठी गर्दी केली होती. तीन तरुण मुलांचा अकाली मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. पोलिसांनी या प्रकरणी तपास सुरू असल्याचे सांगितले असून, चौकशीनंतरच अपघाताचे नेमके कारण आणि पोलिसांवर झालेल्या आरोपांमधील तथ्य समोर येईल, असे स्पष्ट केले आहे.