Mumbai Holi : मुंबईकरांना मिळणार घरपोच 'पुरणपोळी'चा स्वाद! पालिकेचा महिला बचत गटांसाठी मोठा पुढाकार; असा घ्या महोत्सवाचा लाभ

Mumbai BMC Puranpoli Ustav 2026: बृहन्मुंबई महानगरपालिकेतर्फे 'पुरणपोळी महोत्सव 2026' चे आयोजन | ऑनलाईन नोंदणी करणाऱ्यांना घरपोच डिलिव्हरी | महिला बचत गटांना आर्थिक सक्षम करण्याचा पालिकेचा मानस

मुंबई :- होळीच्या सणाला पुरणपोळीचा गोडवा अधिक वाढवण्यासाठी बृहन्मुंबई महानगरपालिका सज्ज झाली आहे. पालिकेने अर्थसहाय्य केलेल्या महिला बचत गटांच्या माध्यमातून यंदा मुंबईकरांना शुद्ध आणि पारंपरिक चवीच्या पुरणपोळ्या घरपोच उपलब्ध करून दिल्या जाणार आहेत. महिलांना स्वावलंबी करण्यासाठी पालिकेच्या नियोजन विभागातर्फे या खास 'पुरणपोळी महोत्सवा'चे आयोजन करण्यात आले आहे.

बचत गटांच्या हाताला मिळाले काम

मुंबईतील गरजू आणि होतकरू महिलांना आर्थिकदृष्ट्या सक्षम करण्यासाठी पालिकेने विविध महिला बचत गटांना मदतीचा हात दिला आहे. गेल्यावर्षी गुढीपाडव्याचा पुरणपोळी महोत्सव आणि गणेशोत्सवातील 'मोदक महोत्सवा'ला मुंबईकरांनी दिलेल्या उदंड प्रतिसादामुळे यंदाही हा उपक्रम राबवण्यात येत आहे. या नाविन्यपूर्ण प्रयोगामुळे घरगुती पद्धतीने तयार केलेल्या दर्जेदार पुरणपोळ्या थेट ग्राहकांपर्यंत पोहोचणार आहेत.

ऑनलाईन नोंदणी आणि घरपोच सेवा

वाढत्या मागणीचा विचार करून पालिकेने यासाठी ऑनलाईन नोंदणीची सुविधा उपलब्ध करून दिली आहे. ज्या नागरिकांना या पुरणपोळ्यांचा आस्वाद घ्यायचा आहे, त्यांनी https://shgeshop.com या संकेतस्थळावर जाऊन आपली मागणी नोंदवायची आहे. १ मार्च २०२६ पर्यंत ही नोंदणी प्रक्रिया सुरू होती. नोंदणी केलेल्या सर्व ग्राहकांना आज, २ मार्च २०२६ (होळीच्या दिवशी) या पुरणपोळ्यांचे घरपोच वितरण केले जाणार आहे.

प्रशासकीय माहिती
या उपक्रमाबाबत माहिती देताना संचालक (नियोजन) डॉ. प्राची जांभेकर यांनी सांगितले की, "महिला बचत गटांना व्यावसायिक संधी उपलब्ध करून देणे हा पालिकेचा मुख्य उद्देश आहे. या महोत्सवामुळे महिलांच्या कौशल्याला वाव मिळत असून ग्राहकांनाही सणासुदीला घरगुती चवीचे पदार्थ मिळत आहेत."