Mumbai News : मुंबई पालिकेचे शिवडीत 'पेडेस्ट्रियन फर्स्ट' अभियान; अनधिकृत दुकाने अन् फेरीवाल्यांवर चालवला बुलडोझर!'

Mumbai News :मुंबई :- मुंबईतील पदपथांवरून पादचाऱ्यांना विनाअडथळा आणि सुरक्षितपणे चालता यावे, यासाठी बृहन्मुंबई महानगरपालिकेच्या वतीने ‘पेडेस्ट्रियन फर्स्ट’ (पादचारी प्रथम) हे विशेष अभियान राबवले जात आहे. उच्च न्यायालयाच्या निर्देशांनुसार आणि महापालिका आयुक्त अश्विनी भिडे यांच्या मार्गदर्शनाखाली ही धडक मोहीम सुरू आहे. या मोहिमेअंतर्गत गुरुवारी एफ-दक्षिण विभागाच्या हद्दीतील शिवडी परिसरामध्ये पदपथांवर अतिक्रमण करणाऱ्यांवर कडक कारवाई करण्यात आली.https://maharashtramirror.com/ Mumbai news

उपायुक्त प्रशांत सपकाळे यांच्या मार्गदर्शनाखाली आणि एफ-दक्षिण विभागाच्या सहाय्यक आयुक्त वृषाली इंगुले यांच्या नेतृत्वाखालील पथकाने शिवडी येथील डी. जी. महाजनी मार्ग आणि जेरबाई वाडिया मार्गावर ही कारवाई केली. कडेकोट पोलीस बंदोबस्तात राबवलेल्या या मोहिमेत

7 अनधिकृत दुकाने आणि 2 अनधिकृत कट्टे तोडण्यात आले.

15 तात्पुरते ताडपत्रीचे शेड हटवण्यात आले.

4 बेवारस साहित्य साठवण ठिकाणे जप्त करण्यात आली.

पदपथ अडवून बसलेल्या 20 फेरीवाल्यांवर निष्कासनाची कारवाई करण्यात आली.

पादचाऱ्यांच्या हक्काचे रस्ते आणि पदपथ मोकळे ठेवण्यासाठी महापालिकेकडून ही मोहीम यापुढेही अशीच तीव्र केली जाणार आहे. पदपथांवर अडथळा निर्माण होईल असे कोणतेही अनधिकृत बांधकाम करू नये किंवा बेकायदा साहित्य ठेवून रस्ता अडवू नये, असे स्पष्ट निर्देश प्रशासनाने दिले आहेत. नियमांचे उल्लंघन करणाऱ्यांवर यापुढे अधिक कठोर कायदेशीर कारवाई केली जाईल, असा सडेतोड इशारा महापालिका प्रशासनाकडून देण्यात आला आहे.