Thane News : 'भिवंडीत राज्य उत्पादन शुल्काचा धडाकेबाज छापा; तब्बल 23 लाखांचा बनावट विदेशी दारूचा साठा अन् 72 हजार बुचे जप्त!'
Thane News : विशेष बातमीदार (महाराष्ट्र मिरर), ठाणे/भिवंडी : - अवैध, बनावट आणि परराज्यातील मद्याच्या विक्रीविरोधात राज्य उत्पादन शुल्क विभागाने धडक मोहीम उघडली आहे.
2 मिनिट वाचन
Thane News : 'लोनाड गावातील शेडमधून 'इम्पिरिअल व्हिस्की'चे 102 बॉक्स हस्तगत; एका आरोपीला बेड्या, दुसरा फरार!'
Thane News : विशेष बातमीदार (महाराष्ट्र मिरर), ठाणे/भिवंडी :- अवैध, बनावट आणि परराज्यातील मद्याच्या विक्रीविरोधात राज्य उत्पादन शुल्क विभागाने धडक मोहीम उघडली आहे. कोकण विभागाच्या भरारी पथकाने भिवंडी तालुक्यातील लोनाड गावात दोन ठिकाणी गुप्त छापे टाकून बनावट विदेशी दारूचा मोठा साठा आणि दारूच्या बाटल्यांची 72 हजार बनावट बुचे जप्त केली आहेत. या कारवाईत पोलिसांनी 22 लाख 98 हजार 680 रुपये किमतीचा दारूबंदी गुन्ह्याचा मुद्देमाल हस्तगत केला असून एका आरोपीला बेड्या ठोकल्या आहेत.राज्य उत्पादन शुल्क विभागाचे आयुक्त डॉ. राजेश देशमुख, सह आयुक्त प्रसाद सुर्वे आणि विभागीय उपआयुक्त प्रदीप पवार यांच्या थेट आदेशानुसार ही धडक कारवाई पार पडली.https://maharashtramirror.com/ Thane News
'शिवनगर अन् जरीमरी मंदिरा जवळ छापे; 72 हजार बनावट बुचे जप्त'
भिवंडी परिसरामध्ये मोठ्या प्रमाणावर बनावट व अवैध मद्याचा साठा उपलब्ध असल्याची गुप्त माहिती राज्य उत्पादन शुल्क, विभागीय भरारी पथक ठाणेचे निरीक्षक दिगंबर शेवाळे यांना मिळाली होती. त्यानुसार पथकाने 5 ऑक्टोबर 2026 रोजी लोनाड गावातील चौधरीपाडा, शिवनगर येथील एका पत्र्याच्या शेडमध्ये आणि राहत्या घराच्या वरच्या मजल्यावर धाड टाकली.https://maharashtramirror.com/ Thane News
तेथून विविध नामांकित ब्रँड्सच्या विदेशी दारूच्या बाटल्यांना लावली जाणारी बनावट प्लास्टिकची व पत्र्याची 72 हजार बुचे जप्त करण्यात आली. या ठिकाणी मिळालेला आरोपी रमेश काळुराम जाधव याला ताब्यात घेऊन त्याच्याकडे सखोल चौकशी करण्यात आली.
'102 बॉक्स बनावट व्हिस्की हस्तगत; एकाला अटक तर दुसरा फरार'
आरोपी रमेश जाधव याने दिलेल्या माहितीच्या आधारे पथकाने लागलीच लोनाड गावातील जरीमरी मंदिराजवळ असलेल्या 'थळे चाळ' येथे दुसरा छापा टाकला. या ठिकाणाहून 'इम्पिरिअल ब्लू व्हिस्की' या ब्रँडच्या 750 मिली क्षमतेच्या बाटल्यांचे 102 बॉक्स जप्त करण्यात आले.
या संपूर्ण कारवाईत पोलिसांनी 22 लाख 98 हजार 680 रुपयांचा मुद्देमाल जप्त करून आरोपी रमेश काळुराम जाधव याला अटक केली आहे, तर त्याचा साथीदार आरोपी सोमनाथ जाधव हा फरार झाला असून त्याला फरार घोषित करण्यात आले आहे. या प्रकरणी महाराष्ट्र दारूबंदी कायदा 1949 च्या विविध कलमांसह भारतीय न्याय संहिता (BNS) 2023 च्या कलम 123 अंतर्गत गुन्हा दाखल करण्यात आला आहे.
'विभागीय भरारी पथकाची यशस्वी कामगिरी'
ही कारवाई निरीक्षक दिगंबर शेवाळे, दुय्यम निरीक्षक एच. बी. यादव, रिंकेश दांगट, सहाय्यक दुय्यम निरीक्षक एम. पी. कोळेकर, तसेच जवान हनुमंत गाढवे, अमित सानप, कुणाल तडवी आणि वाहनचालक विजय उतेकर यांनी पार पाडली.या मोहिमेत राज्य उत्पादन शुल्क भिवंडी विभागाच्या निरीक्षकांनी व कर्मचाऱ्यांनी विशेष मदत केली. या प्रकरणाचा पुढील सखोल तपास निरीक्षक दिगंबर शेवाळे करत आहेत.
