Dehradun News : बनावट कागदपत्रांद्वारे पासपोर्ट घेतल्याचा आरोप; आचार्य बाळकृष्ण निर्दोष

Dehradun News डेहराडून : पतंजली योगपीठाचे सरचिटणीस आणि बाबा रामदेव यांचे सहकारी आचार्य बाळकृष्ण यांची बनावट कागदपत्रांच्या आधारे पासपोर्ट मिळवल्याच्या आरोपातून निर्दोष मुक्तता करण्यात आली आहे. डेहराडून येथील सीबीआयच्या विशेष न्यायालयाने हा निर्णय दिला. तब्बल १५ वर्षांपासून सुरू असलेल्या या प्रकरणाचा अखेर निकाल लागला आहे.https://maharashtramirror.com/ Dehradun News

पासपोर्ट मिळवण्यासाठी बरेली येथील पासपोर्ट कार्यालयात आचार्य बाळकृष्ण यांनी शैक्षणिक कागदपत्रे सादर केल्याचा आरोप होता. ही कागदपत्रे खुर्जा येथील संस्कृत महाविद्यालयाची असल्याचा दावा करण्यात आला होता. महाविद्यालयाचे तत्कालीन मुख्याध्यापक नरेश द्विवेदी यांनी हे प्रमाणपत्र दिल्याचे तपासात समोर आले होते. या प्रकरणात सीबीआयने नरेश द्विवेदी यांनाही सहआरोपी केले होते.https://maharashtramirror.com/ Dehradun News

तपास यंत्रणांनी सादर केलेल्या कागदपत्रांवर आक्षेप घेत त्यांना बनावट ठरवण्यात आले होते. त्यानंतर संबंधित कलमांनुसार आचार्य बाळकृष्ण यांच्याविरोधात गुन्हा दाखल करण्यात आला. या प्रकरणाच्या तपासादरम्यान जुलै २०११ मध्ये उत्तराखंड उच्च न्यायालयाने त्यांच्या अटकेवर अंतरिम बंदी घातली होती. तसेच त्यांना पासपोर्ट न्यायालयात जमा करण्याचे निर्देश देण्यात आले होते.

खटल्याच्या सुनावणीदरम्यान आचार्य बाळकृष्ण यांचा पासपोर्ट बराच काळ न्यायालयात जमा होता. त्यानंतर २०१८ मध्ये उत्तराखंड उच्च न्यायालयाने त्यांना पासपोर्ट काढण्याची तसेच त्याचे नूतनीकरण करण्याची परवानगी दिली होती. मात्र, या प्रकरणाची न्यायालयीन प्रक्रिया सुरूच होती.

तृतीय अतिरिक्त मुख्य न्यायदंडाधिकारी यांच्या न्यायालयाने सुनावणीनंतर आचार्य बाळकृष्ण यांची सर्व आरोपांतून निर्दोष मुक्तता केली. त्यामुळे गेल्या दीड दशकापासून सुरू असलेल्या या खटल्याला अखेर पूर्णविराम मिळाला आहे. निकालानंतर आचार्य बाळकृष्ण यांनी हा न्यायव्यवस्थेवरील त्यांच्या विश्वासाचा विजय असल्याचे म्हटले.