Mumbai News : टायगर श्रॉफ गोळीबार प्रकरणात सर्वात मोठा खळबळजनक गौप्यस्फोट! हल्ल्यानंतर आरोपींचा थेट नेपाळला पळून जाण्याचा होता प्लॅन

Mumbai News : मुंबई/जयपूर :- बॉलीवूड अभिनेता टायगर श्रॉफच्या कारवर जुहू परिसरात झालेल्या सनसनाटी गोळीबार प्रकरणाला आता आंतरराष्ट्रीय वळण मिळण्याची शक्यता निर्माण झाली आहे. राजस्थानमधील कोटा रेल्वे स्थानकावरून मुंबई पोलिसांच्या साहाय्याने जेरबंद करण्यात आलेल्या तिन्ही मुख्य हल्लेखोरांची कसून चौकशी केली असता, एकामागून एक धक्कादायक खुलासे समोर येत आहेत. या हल्ल्यानंतर आरोपींचा प्लॅन अत्यंत खतरनाक होता, मुंबईत गुन्हा करून ते दिल्लीच्या मार्गाने थेट नेपाळला पळून जाण्याच्या तयारीत होते, असा मोठा गौप्यस्फोट राजस्थान पोलिसांनी केला आहे.https://maharashtramirror.com/ Mumbai News

जुहू येथे गोळीबार केल्यानंतर हे तिन्ही हल्लेखोर तात्काळ मुंबईतून पसार झाले होते आणि सुरक्षेच्या दृष्टीने रेल्वेने राज्याबाहेर पळून जात होते. त्यांच्या हालचालींची कुणकुण लागताच राजस्थान पोलिसांनी अत्यंत तत्परता दाखवत कोटा रेल्वे स्थानकावर अवघ्या पंधरा मिनिटांत संपूर्ण ट्रेनची कसून तपासणी केली आणि आरोपींना शिताफीने ताब्यात घेतले. या कारवाईमुळे आरोपींचे देश सोडण्याचे मनसुबे धुळीस मिळाले असून पोलिस यंत्रणेने मोठा अनर्थ टाळला आहे.

राजस्थानमधून पकडण्यात आलेल्या या शूटरची कसून चौकशी सुरू असून, या कटामागे नेमकी कोणती गँग सक्रिय आहे आणि त्यांना नेपाळमध्ये आश्रय घेण्यासाठी कोणी मदत केली होती, याचा सखोल तपास केला जात आहे. या तिन्ही आरोपींना आता ट्रान्झिट रिमांडद्वारे मुंबईत आणले जात असून, लवकरच या संपूर्ण प्रकरणामागील मुख्य सूत्रधाराचा पर्दाफाश होण्याची दाट शक्यता वर्तवली जात आहे.