Sanjay Raut : "मोदी-शहांनी केजरीवालांची माफी मागावी!"; मद्य घोटाळ्यात 'क्लीन चीट' मिळाल्यावर संजय राऊतांचा संताप; सीबीआय अधिकाऱ्यांच्या निलंबनाचीही मागणी

Sanjay Raut On PM Modi : केजरीवालांसह 23 आरोपींची निर्दोष मुक्तता | "राजकीय स्वार्थासाठी मुख्यमंत्र्यांना फरफटत तुरुंगात नेले" | संजय राऊतांनी सुनावले सरकारला खडे बोल

मुंबई :- कथित मद्य धोरण घोटाळ्याप्रकरणी दिल्लीच्या राऊस एव्हेन्यू विशेष न्यायालयाने दिलेला निकाल केंद्रातील सत्ताधारी भाजपसाठी मोठा धक्का मानला जात आहे. अरविंद केजरीवाल आणि मनीष सिसोदिया यांच्यासह 23 जणांची न्यायालयाने निर्दोष मुक्तता केली आहे. यावर प्रतिक्रिया देताना खासदार संजय राऊत यांनी केंद्राच्या 'दडपशाही'वर ताशेरे ओढले आहेत.

"केस पोकळ होती, पुरावे नव्हते"

संजय राऊत यांनी न्यायालयाच्या निरीक्षणाचा दाखला देत म्हटले की, "न्यायालयाने हे स्पष्ट केले आहे की ही संपूर्ण केस अत्यंत पोकळ होती. सीबीआयकडे कोणताही ठोस पुरावा नव्हता. तरीही केवळ बदनामी करण्यासाठी आणि निवडणुका जिंकण्यासाठी केजरीवालांना तुरुंगात टाकले गेले. ज्या मुख्यमंत्र्यांना देशाने फरफटत नेताना पाहिले, त्यांच्यावर झालेला अन्याय आज सिद्ध झाला आहे."

पंतप्रधान आणि गृहमंत्र्यांवर निशाणा

राऊत यांनी थेट पंतप्रधान नरेंद्र मोदी आणि गृहमंत्री अमित शाह यांच्यावर आरोप करत म्हटले की:

राजकीय षडयंत्र: "लोकसभा आणि विधानसभा निवडणुका जिंकण्याच्या उद्देशाने हे राजकीय नाटक रचले गेले होते. केजरीवालांच्या प्रामाणिकपणावर प्रश्नचिन्ह उपस्थित करून त्यांची प्रतिमा मलीन करण्याचे काम सर्वोच्च पदावर बसलेल्या व्यक्तींनी केले."

माफीची मागणी: "ज्या अर्थी न्यायालयाने केजरीवालांना निर्दोष मुक्त केले आहे, त्या अर्थी आता पंतप्रधान मोदी आणि अमित शाह यांनी जाहीरपणे त्यांची माफी मागितली पाहिजे."

अधिकारी आणि यंत्रणांच्या गैरवापरावर टीका

राऊत यांनी केवळ नेत्यांवरच नाही, तर तपास यंत्रणांवरही निशाणा साधला. "ज्या सीबीआय अधिकाऱ्यांनी दबावाखाली येऊन पुराव्याविना अटक केली, त्यांना सरकारने तत्काळ निलंबित करावे आणि त्यांच्यावर कायदेशीर खटले चालवावेत," अशी मागणी त्यांनी केली. तसेच, महाराष्ट्रातील अनिल देशमुख, नवाब मलिक आणि स्वतःच्या अटकेचा संदर्भ देत त्यांनी तपास यंत्रणांच्या गैरवापराबद्दल चिंता व्यक्त केली.

"सत्याचा विजय, अहंकाराचा पराभव"

संजय राऊत यांनी शेवटी नमूद केले की, "हेमंत सोरेन असोत किंवा केजरीवाल, सर्वांना शेवटी न्यायालयाने सोडले आहे. काहींची अटक बेकायदेशीर असल्याचे न्यायालयाने आधीच सांगितले आहे. कालचा निकाल हा सत्याचा विजय असून अहंकारी सत्तेला चपराक देणारा आहे."