Rohit Pawar : "अजितदादांच्या नंबरवर फोन केला, पण आवाज आला नाही…"; अपघाताला एक महिना पूर्ण होताच रोहित पवार भावूक! घातपाताच्या संशयावर अजूनही ठाम

Rohit Pawar On Ajit Pawar Accident : 28 जानेवारीच्या त्या 'काळ्या' रात्रीच्या आठवणींना दिला उजाळा | सोशल मीडियावर रोहित पवारांची हृदयस्पर्शी पोस्ट | अपघाताच्या चौकशीवरून राज्य सरकारला पुन्हा घेरले

मुंबई :- अजित पवार यांच्या निधनाला आज बरोबर एक महिना पूर्ण झाला. 28 जानेवारी रोजी बारामतीजवळ त्यांचे विमान लँडिंगच्या वेळी कोसळले आणि क्षणात एका मोठ्या स्फोटासह आगीच्या भक्ष्यस्थानी पडले. या भीषण अपघातात महाराष्ट्राने आपला लाडका 'दादा' गमावला. आजही बारामतीकरांच्या आणि पवार कुटुंबाच्या डोळ्यांतील अश्रू थांबलेले नाहीत.

"ते आजही एक वाईट स्वप्न वाटते" - रोहित पवार

आपल्या काकांच्या निधनानंतर रोहित पवार यांनी आज ट्विटर (X) वर एक भावूक संदेश लिहिला आहे. त्यांनी त्या रात्रीचा थरार शब्दांत मांडताना म्हटले;"जे घडले ते अजूनही एखादे वाईट स्वप्नच वाटते. त्या काळ्या दिवशी बातमी समजताच मी तातडीने अजितदादांच्या नंबरवर फोन केला… मन सावरत नव्हतं, पण कॉल उचलला गेला नाही. त्यांचा तो नेहमीचा कणखर आवाज पुन्हा कधीच ऐकू येणार नाही, याची जाणीव खूप वेदनादायक आहे. खूप आठवण येतेय दादा!"

दुःख आणि संशयाचे काहूर

रोहित पवार केवळ हळवे झाले नाहीत, तर त्यांनी या अपघाताभोवती असलेल्या संशयावर पुन्हा एकदा बोट ठेवले आहे. हा अपघात होता की घातपात? या प्रश्नाचे उत्तर शोधण्यासाठी त्यांनी स्वतः तांत्रिक माहिती गोळा करण्यास सुरुवात केली आहे. कालच त्यांनी 'शिवतीर्थ'वर राज ठाकरे यांची भेट घेऊन या प्रकरणातील काही पुरावे सादर केल्याने राजकीय वर्तुळात खळबळ उडाली आहे.

महाराष्ट्रात आजही शोककळा

अजित पवार यांच्या आकस्मिक जाण्याने राज्याच्या विकासकामांच्या वेगाला जसा ब्रेक बसला, तसाच तो त्यांच्या कार्यकर्त्यांच्या मनालाही लागला आहे. आज एक महिना पूर्ण झाल्याच्या निमित्ताने बारामती आणि पुण्यात विविध ठिकाणी श्रद्धांजली अर्पण करण्यात येत आहे. 'दादां'चा कडक शिस्तीचा पण तितकाच प्रेमळ स्वभाव आठवून अनेक कार्यकर्ते आजही भावूक होताना दिसत आहेत.