Pune News : वारजे-कर्वेनगरमध्ये कचरा विभागावर भ्रष्टाचाराचा आरोप

Pune News : पुणे, महाराष्ट्र मिरर : वारजे-कर्वेनगर परिसरातील महापालिकेच्या घनकचरा व्यवस्थापनावर शिवसेनेचे युवा नेते निलेश माझीरे यांनी गंभीर आरोप केले आहेत. ‘जिथे पैसे, तिथे कचरा गाडी वेळेआधी हजर’ अशी परिस्थिती निर्माण झाल्याचा दावा करत संबंधित आरोग्य निरीक्षक, वरिष्ठ आरोग्य निरीक्षक आणि मोकादम यांच्या कामकाजाची चौकशी करून तातडीने कारवाई करण्याची मागणी त्यांनी महापालिका आयुक्तांकडे केली आहे.https://maharashtramirror.com/Pune News

वारजे-कर्वेनगर परिसरात जागोजागी कचऱ्याचे ढीग साचत असून त्यामुळे सामान्य नागरिक त्रस्त असल्याचा दावा माझीरे यांनी केला. घनकचरा विभागातील संबंधित अधिकारी आणि कर्मचारी कचरा व्यवस्थापनाकडे लक्ष देण्याऐवजी कथित वसुलीमध्ये व्यस्त असल्याचा आरोपही त्यांनी केला आहे.

महापालिकेच्या घनकचरा विभागाच्या कामकाजावर प्रश्नचिन्ह उपस्थित करत माझीरे यांनी थेट महापालिका आयुक्तांचे लक्ष या प्रकरणाकडे वेधले आहे. पैसे मिळणाऱ्या ठिकाणी कचरा संकलनाची गाडी वेळेआधी पोहोचते; मात्र सामान्य नागरिकांच्या भागात कचऱ्याचे ढीग कायम असल्याचा आरोप त्यांनी केला. या आरोपांबाबत संबंधित महापालिका अधिकारी किंवा घनकचरा विभागाची बाजू उपलब्ध झालेली नाही.

महापालिका आयुक्तांनी या प्रकरणाची गंभीर दखल घेऊन संबंधित यंत्रणेची चौकशी करावी आणि दोषींवर कडक कारवाई करावी, अशी मागणी माझीरे यांनी केली आहे. कारवाई न झाल्यास शिवसेना आणि युवासेनेच्या वतीने महापालिकेविरोधात तीव्र आंदोलन छेडण्यात येईल, असा इशाराही त्यांनी दिला.

“जिथे पैसे, तिथे कचरा गाडी वेळेआधी हजर, अशी अवस्था वारजे-कर्वेनगर हद्दीत झाली आहे. आयुक्तांनी या भ्रष्ट यंत्रणेवर तात्काळ कडक कारवाई करावी; अन्यथा शिवसेना आणि युवासेनेच्या वतीने महानगरपालिकेविरोधात तीव्र आंदोलन छेडले जाईल.”
— निलेश माझीरे, युवा नेते, शिवसेना