Sunetra Pawar : उपमुख्यमंत्री सुनेत्रा पवार विधानपरिषदेत भावूक! "अरे संसार संसार…" म्हणताना दाटला कंठ; महिला सक्षमीकरणाचा मांडला 'रोडमॅप'

Sunetra Pawar Latest News : दिवंगत अजित पवार यांच्या निधनानंतर सुनेत्रा पवारांचे सभागृहात पहिलेच भाषण; 'शक्ती कायदा' आणि 'लवकर या, लवकर जा' संकल्पनेवर भर

मुंबई :- विधानपरिषदेच्या सभागृहात आज एक अभूतपूर्व आणि हृदयद्रावक प्रसंग पाहायला मिळाला. राज्याचे दिवंगत नेते अजित पवार यांच्या निधनानंतर उपमुख्यमंत्रिपदाची धुरा साभाळणाऱ्या सुनेत्रा पवार Sunetra Pawar यांनी आज सभागृहात आपले पहिलेच भाषण केले. हे केवळ एक राजकीय भाषण नव्हते, तर त्यामध्ये एका पत्नीची वेदना आणि एका महिला नेत्याचा राज्यातील भगिनींसाठी असलेला आश्वासक 'रोडमॅप' स्पष्टपणे जाणवत होता. महिला सक्षमीकरणावर बोलताना भाषणाच्या शेवटी त्यांना अश्रू अनावर झाले आणि संपूर्ण सभागृह काही काळ स्तब्ध झाले.

बहिणाबाईंच्या ओळी आणि दाटलेला कंठ

आपल्या भाषणाची सांगता करताना सुनेत्रा पवार यांनी कवयित्री बहिणाबाई चौधरी यांच्या अजरामर ओळी उद्धृत केल्या. "अरे संसार संसार, जसा तवा चुल्यावर… आधी हाताला चटके, तेव्हा मिळते भाकर…" या ओळी म्हणताना त्यांचा आवाज जड झाला आणि डोळ्यांत अश्रू तरळले. "या ओळीत स्त्रियांच्या सहनशीलतेची आणि कष्टाची मोठी ताकद दडलेली आहे," असे सांगताना त्यांना हुंदका अनावर झाला. त्यांच्या शेजारी बसलेल्या मंत्री अदिती तटकरेही हे दृश्य पाहून भावूक झाल्या. पतीच्या निधनानंतरची वैयक्तिक पोकळी आणि राज्याचा गाडा हाकण्याची जबाबदारी, अशा दुहेरी संघर्षाचे प्रतिबिंब त्यांच्या या भावूक क्षणांमध्ये उमटले होते.

महिलांसाठी 'लवकर या, लवकर जा'चा नवा मंत्र

केवळ भावूक न होता सुनेत्रा पवार यांनी राज्यातील महिलांच्या प्रगतीसाठी ठोस कृती आराखडाही मांडला. नोकरी करणाऱ्या महिलांच्या कौटुंबिक जबाबदाऱ्यांचा विचार करून त्यांनी ‘लवकर या, लवकर जा’ (Flexible Timing) ही अभिनव संकल्पना राबवण्याची घोषणा केली. यामुळे नोकरी आणि घर यांचा मेळ घालणे महिलांना सोपे जाणार आहे. विशेषतः मुंबईतील शासकीय महिला कर्मचाऱ्यांच्या गरजा लक्षात घेऊन त्यांना विशेष सवलती देण्यावर सरकारचा भर असल्याचे त्यांनी स्पष्ट केले.

'शक्ती' कायद्यासाठी सरकारची कटीबद्धता

महिलांच्या सुरक्षेचा प्रश्न ऐरणीवर असताना, प्रलंबित असलेला ‘शक्ती कायदा’ लवकरात लवकर संमत करण्यासाठी शासन पूर्ण ताकदीने प्रयत्न करेल, अशी ग्वाही त्यांनी दिली. "यंदाचे वर्ष हे 'महिला वर्ष' म्हणून साजरे केले जाईल आणि प्रत्येक स्त्रीला सन्मान, संधी आणि सुरक्षितता मिळवून देणारा समाज घडवणे हाच आपला संकल्प आहे," असे त्यांनी ठामपणे सांगितले.