Pune News : पुणे शिक्षक मतदारसंघात महायुतीत मैत्रीपूर्ण लढत! शिंदे सेनेकडून अपक्ष उमेदवार सचिन सानपांना जाहीर पाठिंबा

Pune News : पुणे :- पुणे विभाग विधानपरिषद शिक्षक मतदारसंघाच्या निवडणुकीमुळे महायुतीमधील राजकीय समीकरणे बदलताना दिसत आहेत. एकीकडे भारतीय जनता पक्षाने कौस्तुभ गावडे यांना रिंगणात उतरवले असताना, दुसरीकडे उपमुख्यमंत्री एकनाथ शिंदे यांच्या नेतृत्वाखालील शिवसेना पक्षाने बंडखोर तथा अपक्ष उमेदवार सचिन सानप यांना पाठिंबा जाहीर केल्यामुळे मोठी खळबळ उडाली आहे. यामुळे महायुतीमध्येच 'फ्रेंडली फाईट' (मैत्रीपूर्ण लढत) पाहायला मिळणार असून, या निर्णयामुळे भाजपच्या गोटात चिंतेचे वातावरण निर्माण झाले आहे.Pune News https://maharashtramirror.com/

पुणे शिक्षक मतदारसंघातून अपक्ष म्हणून निवडणुकीच्या मैदानात उतरलेले प्राध्यापक सचिन सानप हे मूळचे उच्च आणि तंत्रशिक्षण मंत्री उदय सामंत यांचे ओएसडी (Officer on Special Duty) म्हणून कार्यरत होते. पक्षाकडून उमेदवारी न मिळाल्यामुळे त्यांनी अखेर अपक्ष म्हणून निवडणुकीच्या रिंगणात उतरण्याचा निर्णय घेतला होता. शिक्षकांचे प्रश्न, प्राध्यापक व शिक्षकांच्या अडीअडचणी आणि शैक्षणिक क्षेत्रातील खालावलेली गुणवत्ता याविरोधात सातत्याने आवाज उठवणारे तरुण चेहरे म्हणून त्यांची ओळख निर्माण झाली आहे. शैक्षणिक संस्थांच्या संचालकांशी संवाद साधत त्यांनी आपल्या प्रचाराचा धडाका लावला असून, आता थेट शिंदेसेनेने पाठिंबा दिल्याने त्यांच्या राजकीय ताकदीत मोठी भर पडली आहे.

पुणे आणि अमरावती शिक्षक मतदारसंघाच्या जागांच्या वाटपावरून महायुतीमध्ये सुरुवातीपासूनच मतभेद असल्याचे समोर आले होते. स्थानिक पदाधिकाऱ्यांच्या आग्रहाखातर आणि मुख्यमंत्र्यांच्या सकारात्मक भूमिकेमुळे अखेर शिंदेसेनेने अपक्ष उमेदवार सचिन सानप यांच्या पारड्यात आपले वजन टाकल्याचे बोलले जात आहे. महायुतीमधील घटक पक्ष आमनेसामने आल्यामुळे या निवडणुकीत आता चुरस वाढली असून, शिक्षक मतदार नेमकी कोणाच्या बाजूने कौल देतात, हे पाहणे कमालीचे ठरणार आहे.