Delhi News : नवी दिल्लीत 'सीजेपी'च्या नेत्यांवर पुन्हा कारवाई; बाँड लिहून देऊनही 'जंतर मंतर' आंदोलन प्रकरणी तुरुंगात रवानगी

Delhi News :नवी दिल्ली: कॉकरोच जनता पार्टी (CJP) या राजकीय पक्षाचे संस्थापक अभिजीत दीपके तसेच नेते सौरव दास आणि आशुतोष रांका यांना अखेर तुरुंगात जावे लागले आहे. मागील आठवड्यात दिल्ली पोलिसांनी या नेत्यांना अटक केली होती. त्यानंतर, 'पुढील वर्षभर कोणतेही हिंसक आंदोलन करणार नाही' असा हमीपत्र (बॉंड) कोर्टात लिहून दिल्यानंतर पोलिसांनी त्यांची सुटका केली होती. परंतु, न्यायालयीन हमीपत्र दिल्यानंतर काही दिवसांतच त्यांनी पुन्हा आंदोलन केल्यामुळे ही कारवाई करण्यात आली आहे.https://maharashtramirror.com/ Delhi News

जंतर मंतर हे ठिकाण अधिकृत आंदोलनस्थळांच्या यादीतून वगळण्यात आले आहे. असे असतानाही, या निर्णयाच्या दुसऱ्याच दिवशी कॉकरोच जनता पार्टीच्या या नेत्यांनी हातात तिरंगा ध्वज घेत जंतर मंतरच्या दिशेने कूच केले आणि घोषणाबाजी सुरू केली.

प्रतिबंधित क्षेत्रात आंदोलन केल्याप्रकरणी दिल्ली पोलिसांनी तातडीने पावले उचलत सौरव दास, आशुतोष रांका आणि अजिंक्य शिंदे यांना मंगळवारी ताब्यात घेतले. पोलिसांच्या आदेशाचा अवमान करणे आणि शासकीय नियमांचे उल्लंघन केल्याप्रकरणी त्यांच्यावर गुन्हा दाखल करण्यात आला आहे. वर्षभर शांतता राखण्याचे दिलेले आश्वासन मोडून नियमभंग केल्यामुळे या नेत्यांची अखेर तुरुंगात रवानगी करण्यात आली आहे.